Сашко Тасев е единствен што доби зелено светло од Комисија за избор и верификација при Фудбалската федерација на Македонија (ФФМ) да биде наследник на претседателот Илчо Ѓорѓиоски. Кандидатот на ОФС Кавадарци, како што стои на интернет страницата на ФФМ, „се прифаќа со оглед на тоа што ги исполнува општите и посебниот услов од Статутот на Фудбалската федерација на Македонија“.
Комисијата истовремено ги одби останатите претседателски кандидати – Влатко Костов (ОФС Тетово), Вујадин Станојковиќ (ОФС Куманово) и Харалампие Хаџи-Ристески (ОФС Неготино и ОФС Ресен). Образложението за сите тројца е идентично – „не се прифаќаат од причина што не го исполнуваат посебниот услов за кандидат за претседател на Фудбалската федерација на Македонија утврден со член 91 став 1 од Статутот на Фудбалската федерација на Македонија“.
Ова е епилог по целодневната расправа на Комисија за избор и верификација при ФФМ чии членови започнаа со работа околу пладне, а завршија доцна вечерва. Притоа се нагласува дека донесените одлуки не се конечни, а одбиените кандидати имаат право на жалба во рок од три дена.
Вонредната изборна седница на Генералното Собарние на ФФМ е закажана на први септември.