Ваквата одлука на вторстепениот совет на Судот на честа е конечна и Дамчевски нема право на жалба
Лекарската комора му ја одзема лиценцата за работа на гинекологот Николче Дамчевски, кој девет месеци лажел пациентка дека е бремена, а при тоа и давал и терапија со што го загрозил нејзиното здравје. Ваква одлука донел второстепениот совет при Судот на честа на Лекарската комора на седница одржана на 23.11.2017 година кој одлучувал по жалбата на Дамчевски, против одлуката на Првостепениот судски совет при Судот на честа со која времено му се одзема лиценцата за работа во траење од седум години.
„Членовите на Второстепениот совет ја разгледа жалбата и наводите во неа и донесоа одлука со која ја потврдија обжалената одлука која беше донесена во прв степен пред Судот на честа. Со неа д-р Николче Дамчевски е прогласен за виновен во постапка за случајот кога лекувал и спроведувал постапки на биолошко потпомогнато оплодување на пациентка, ја водел како бремена, иако таа не била. Во целиот период на т.н бременост докторот ја следел, ја информирал за напредокот на бременоста, ординирал терапија за одржување на бременоста се до наводниот термин за породување кога и соопштил дека воопшто не пости бременост. Со наведените дејства, како што оцени Судот на честа, докторот ги прекршил одредбите од Кодексот на медицинска деонтологија и му се изрече мерка времено одземање на лиценцата за работа во траење од 7 години“, се вели во соопштението на Лекарската комора.
Ваквата одлука на второстепениот Совет на Судот на честа е конечна и Дамчевски нема право на жалба. На одлуката на простепениот и второстепениот Совет на судот на честа претходеше сослушување и соочување на двајцата, гинекологот и пациентката. Дамчевски од пациентка е обвинет дека девет месеци ја лажел дека е бремена и и давал непотребни лекови и хормони, а на сослушувањето пред Судот на честа постојано тврдел дека тоа го правел за добро на пациентката.
Откако НОВА ја објави сторијата за гинекологот Дамчевски кој девет месеци лажел пациентка дека е бремена и Основното јавно обвинителство отвори истражна постапка против обвинетиот гинеколог кој во периодот од месец септември 2015 до април 2016 година презентирал состојба на лажна симулирана бременост на пациентка, врз која претходно спровел биолошки потпомогнато оплодување.
Обвинителството побара од судот до завршување на судскиот процес на гинекологот да му одреди мерка забрана за напуштање на државата, да му биде одземен пасошот, како и обврска да се јавува повремено на определено службено лице или кај надлежен државен орган. На гинекологот му се заканува затворска казна од една до десет години.
Гинекологот Дамчевски подолго време е суспендиран од работа на Клиниката за гинекологија. Тој на Клиниката беше вработен и покрај бројните укажувањата и на други пациентки дека истото се случавало со нив, како и за финасиски малверзации при што не им издавал фискални сметки, ниту постоело медицинско досие.