Ајакс, Бриж и прашка Славија се последните патници во групната фаза во фудбалската Лига на шампиони. „Копјаниците“ од Амстердам, кои играа во полуфинале во минатата сезона, го совладаа АПОЕЛ на својата „Јохан Кројф“ арена со 2:0 (првиот меч во Никозија заврши без голови) и повторно се потврдија како дел од европската клупска елита.
Мексиканецот Едсон Алварез во 43. минута и српскиот репрезентативец Душан Тадиќ во 80. минута беа стрелци за холандскиот претставник кој доминиташе во текот на целиот меч со кипарскиот првак.
Славија Прага го елиминира романски Клуж и по пауза од 12 години се враќа во главната фаза во ЛШ. Чешкиот состав славеше со 1:0 и во реваншот со голот на Јан Борил во 66. минута.
Бриж, пак, со вкупни 3:1 го елиминира ЛАСК за трето учество во групите во ЛШ во последните четири сезони. Белгискиот тим беше подобар од австрискиот и во реваншот со 2:1 за потврда на минималниот триумф пред седум дена во Линц.
Ханс Ванакен во 70. минута и Емануел Денис во 89. минута за домашните, Жоао Клаус во 74. минута од пенал го постигна единствениот за гостите.
Плејоф за Лига на шампиони, реванши
Ајакс – АПОЕЛ 2:0 (0:0)
Славија Прага – Клуж 1:0 (1:0)
Бриж – ЛАСК Линц 2:1 (1:0)