Јелена Остапенко (20) е новата шампионка на Ролан Гарос. Првата Летонка со гренслем титула во финалето славеше над Симона Халеп со 4:6, 6:4, 6:3 и по нешто повеќе од два часа игра пред распродадените трибини на „Филип Шатрие“ ја наследи Гарбине Мугуруза на тронот.
Остапенко, чиј тренер е Шпанката Анабел Медина Гаригез, направи 54 неизнудени грешки, но и исто толку винери во финалето. Сервисот не беше нејзин адут денеска (57 отсто) што го компензираше со одличните и прецизни ритерни и на прв и на втор почетен удар на Романката која, пак, иако забележа само 10 неизнудени грешки, сепак, се радуваше на само 8 директни поени.
Таа е трета девојка која е родена по 1990 година со трофеј на турнирите од големата четворка по Петра Квитова и Мугуруза. Од 47 место на ВТА ранг листата ќе напредува до 12. на најновата што ќе биде објавена во понеделник.
За победата во Париз, нејзина најголема во кариерата, ќе добие чек на износ од 2,1 милиони евра. Колку за илустрација, до денеска имаше заработено околу еден милион евра.
Ролан Гарос
Жени, финале
Остапенко (Летонија) – Халеп (3., Романија) 4:6, 6:4, 6:3