Судечкиот совет го одби приговорот на одбраната на обвинетите во „Тенк“ и прифати СЈО да ги презентира новодобиените докази.
Обвинителот Стевчо Донев рече дека новите докази биле добиени со замолница за меѓунaродна правна помош, содржaт 58 страници на македонски, германски и англиски јазик. Станува збор за е-маил комуникација меѓу Дајмлер бенц и Мак аутостар.
Адвокатите на обвинетите беа против судот да ги прифати новите докази на СЈО, но по инсистирањето на обвинителите дека станува збор за битни докази, судечкиот совет реши да ги прифати и да бидат разгледувани во постапката.
Содржината на новите докази не беше презентирана на денешното рочиште, а расправата продолжи со изведување докази на одбраната.
Судијката Добрила Кацарска ја опомена адвокатката на Никола Груевски дека изведува докази кои не смее да ги презентира во оваа фаза.
– На некој нечесен начин се обидувате да протнете доказ. Најпрвин ќе ги прочитате оние докази за кои судот ви дозволи да ги изведете. Држете се стриктно до тие докази. Тој технички наод и мислење кој го спомнавте, до овој момент ниту е доставен ниту најавен пред судот, затоа не можете да го изведете во оваа фаза, ја искара судијката Кацарска адвокатката Сања Алексиќ.
Груевски пак, побара од судот како доказ да ги прифати и документите за набавка на службен автомобил во Општина Новаци.
Според него и овој автомобил бил набавен на ист начин како мерцедесот, за што нему му се суди.
-Сакам да истакнам дека немаме намера да го одолговлекуваме рочиштето. Барањето да го дозволите доказот за набавка на автомобилот од страна на општина Новаци е со иста цел, односно да се докаже дека не постоело фаворизирање на компанија, рече Груевски.
На прашање на судијката Добрила Кацарска каде е писменото известување од општината за овој доказ, адвокатката истакна дека не го добила официјално, по што судијката заклучи дека некој и го дал на рака и искоментира дека сега и е јасно се.
Обвинителот Стевче Донев истакна дека доказот не е стекнат на законски начин и побара истиот да не се изведува.
Инаку, за денеска во Кривичниот суд беа закажани завршните зборови за случајот на СЈО „Тенк“, во кој за набавката на мерцедесот од претходната Влада, во вредност од 600.000 евра, обвинети се поранешниот премиер Никола Груевски и поранешниот помошник министер во МВР Ѓоко Поповски.
Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.
Во „Тенк“ обвинети се Никола Груевски и поранешниот помошник министер во МВР Ѓоко Поповски, како и поранешната министерката за внатрешни работи Гордана Јанкулоска.
Тројцата се обвинети за набавката на луксузниот мерцедес од 600 илјади евра.
Во судот денеска се присутни Никола Груевски и Ѓоко Поповски.