Од крајот на декември досега од корона-вирусот починале 492 лица, додека повеќе од 24.500 се заразени, соопштија денеска здравствените власти. Болеста се прошири во повеќе од 25 држави ширум светот, а најмногу случаи се регистрирани во Кина, пред се, во провинцијата Хубеи, во која и вирусот се појави, пренесе „Си-Ен-Ен“.
Последните случаи на вирусот се откриени на крузер што пристигнал од Јапонија, во кој се забележани 10 инфицирани лица што било причина за сите 3.700 патници и членови на екипажот на бродот да бидат задржани во карантин во наредните, најмалку, две недели.
Најмногу заразени, но и смртни случаи се забележени во Вухан, градот во кој досега починаа 362 лица, а заразени се 8.351.
Многу земји организираа евакуација на своите граѓани од Кина, а Велика Британија на сите свои граѓани им нареди да ја напуштат оваа земја, не прецизирајќи на кој начин тоа да го изведат, ниту понуди конкретна помош, наведува „Си-Ен-Ен“.
Американскиот Стејт департмент соопшти дека утре ќе испрати уште два авиона за евакуација на свои државјани.