Денеска за нов директор на Јавното претпријатие Комунална хигиена Скопје е назначена Косана Мазнева, соопшти кабинетот на скопската градоначалничка Данела Арсовска.

Мазнева, како што се истакнува, има повеќе од 15 години искуство, од кои како раководитела на сектор природа во Министерство за животна средина и просторно планирање, одговорен инженер и советник за животна средина во АД Електрани на Македонија, а била и поранешен пратеник во Собранието на Македонија во два мандата. Високо образование има завршено на Природно-Математичкиот Факултет во Скопје.

Мазнева е член на опозициската ВМРО-ДПМНЕ.

Нејзиното именување доаѓа по смената на Зуди Енузи, претходен директор на Комунална хигиена, кој „падна“ поради поврзаност со инцидентите на протестите против францускиот предлог. Имено братот на Енузи пукаше со пиштол кон демонстрантите кои поминуваа пред „Мавровка“. Двајцата браќа се истакнати членови на партијата Алијанса за Албанците, поради што оваа партија ја раскина соработката со градоначалничката на Скопје Данела Арсовска. (Р.Н.)