Единствената суштинска причина за војната во Украина е одбивањето на Русија да го прифати украинското право да ја избере сопствената иднина, порача претседателот на Европскиот совет, Антонио Кошта пред Советот за безбедност на ОН во Њујорк.
Мирот во Украина не е само интерес на Украина. Тоа не е само интерес на Европа. Тоа е интерес на глобалната заедница. Ако ја прифатиме инвазијата на Русија врз Украина, ниту една земја никогаш повеќе нема да биде безбедна, истакна синоќа Кошта во обраќање на седница на Советот за безбедност посветена на состојбата во Украина.
Според Кошта, во оваа војна Украина се бори за самите принципи на Повелбата на Обединетите нации – суверенитетот, територијалниот интегритет, почитувањето на меѓународно признатите граници и правото на избор на сопствената судбина.
Оваа војна започна со неоправдан и нелегален напад од страна на Русија. Ја повикувам Русија, која е постојана членка на Советот за безбедност, да се согласи да седне на преговарачката маса. Да запрат убиствата. Да запре со уништувањето. Да престане со заканите кон соседните земји, истакна Кошта.
Тој воедно ја повикува и меѓународната заедница активно да се вклучи во мировните напори со целосно почитување на Повелбата на ОН, додавајќи дека сакал да ја види и Кина, уште една постојана членка на Советот за безбедност, како придонесува за праведен и траен мир во Украина.
Стремежот кон мир мора да биде врвен приоритет на глобалната заедница. Европската Унија ќе продолжи да работи за да се стави крај на оваа војна и ќе ја поддржува Украина на секој начин. Прекинот на огнот, на кој Украина веќе се согласи, е првиот чекор кон тоа, потенцира претседателот на Европскиот совет.
Кошта најави и дека Европската Унија ќе продолжи да врши притисок врз Русија преку санкции за да се стави крај на агресијата и да се обезбеди траен мир со конкретни безбедносни гаранции за Украина.
За да ги исполниме аспирациите на украинскиот народ, ќе продолжиме да ја поддржуваме Украина и на нејзиниот пат кон полноправно членство во Европската Унија. Времето за мир е сега. И сега е време Русија да ја запре оваа агресија, заклучи Кошта во обраќањето.