Во Кривичниот суд во Скопје продолжи судското рочиште за 27 април, со сослушување на четворица сведоци
Прв сведочи Сашко Коцевски, самостоен референт во системот за електронско гласање и мониторинг. Коцевски рече дека до 20 март и самиот бил учесник во протестите на иницијативата „За заедничка Македонија” и дека како учесник добивал насоки од претседателите на општинските комитети на ВМРО-ДПМНЕ против тиранската платформа.
-Ние како партија работиме како војска, добивавме насоки од општинскиот комитет и од претседателите на месните комитети за присуство на протестите на За заедничка Македонија како поддршка против тиранската платформа. Се доаѓаше пред Собранието по слободен избор без уцени и без сендвичи и пари како што имаше шпекулации, рече Коцевски.
Одговарајќи на прашања на одбраната тој кажа дека насоките од партијата биле достоинствено да ги истераат протестите, без никакво нарушување на редот и мирот и без никакви провокации по секоја цена. За говорите на протестите на Борис Дамовски и Игор Дурловски сведокот кажа дека не биле говор на омраза, туку мотивирачки да се издржи во борбата.
Судијката Добрила Кацарска го предупреди да не се осврнува на политичкиот контекст, туку да ја говори фактичката состојба што ја засведочил.
За собраниската седница на 27 април тој кажа дека се до 17.30 часот имала нормален тек. Откако Трајко Велјановски му дал збор на пратеникот од БЕСА Зекирија Ибраими кој ја пееше химната на Албанија. Се кренала тензијата меѓу пратениците, а за збор се јавиле Крсто Мукоски, Илија Димовски и Томислав Тунтев. Мукоски земал збор ја пеел македонската химна, а потоа Велјановски не им дал збор на Димовски и Тунтев бидејќи веќе било 18 часот и ја прекинал седницата затоа што дента немало координација за да се работи подолго.
– Со тоа мое задолжение е да ги исклучам микрофоните. Тоа се некои 2-3 минути додека да се исклучат двата компјутери. Тогаш околу мене имаше неколку пратеници од ВМРО-ДПМНЕ и некој довикна да не се дозволи гласање ако СДСМ се обидат да направат начин за избор на претседател на Собрание. Не знам кој го зборуваше тоа бидејќи мојата позиција е седечка, но кога се свртев позади мене беа пратениците Крсто Мукоски, Љубен Арнаудов, Жаклина Пешевска, Илија Димовски, господинот од социјалистичката партија Димовски и мислам Јохан Тарчуловски. Тогаш дојде некој од обезбедувањето и ми рече да го исклучам системот за гласање и да ја напуштам седницата. Не знам кој полицаец беше, сведочеше тој.
Коцевски рече дека им рекле да се заклучат во собата за техничка режија оти влегол народ во Собранието. Таму, како што рече, биле од 18:40 до 20 часот.
-Останавме заклучени. Се обидувавме да стапиме во контакт со генералниот секретар на Собранието, Жарко Денковски, рече сведокот, објаснувајќи дека Денковски ги побарал подоцна, но како што рече тој само прашал за опремата.
Додека биле заклучени во собата, се слушало викање, тропање и истрели: „Почнаа да викаат: ‘Отворете, отворете! Излезете комуњари’“, рече Коцевски пред судот. Се присети дека на колешката и дал дијазепам за да се смири. Сведокот рече дека се скриле зад регалот, бидејќи се плашеле да не се одбие некој куршум.
Во собата останале до 20 часот, од каде потоа ги извлекол Горан Ѓошевски Леви со уште тројца од собраниското обезбедување.
Апостолски бара изземање на Кацарска
Адвокатот на пратеникот Јохан Тарчуловски, Антонио Апостолски, побара изземање на судијката Добрила Кацарска, бидејќи се сомнева дека таа е во роднински врски со некој од оштетените во предметот.
Судијката побара да го образложи ваквото барање, а тој рече дека во текот на денот ќе достават докази до судот. Апостолски, исто така, рече дека Кацарска тенденциозно го води предметот.
Судијката даде пауза од 1 час за претседателот на судот да одлучи за барањето.
Освен Коцевски, денеска треба да сведочат и пратеникот Ферид Мухиќ, Курто Дудуш и новинарката Душица Мрѓа.