Ковачевски: Догодина 324 милиони евра за модерна инфраструктура   

Премиерот Ковачевски денеска на заедничка прес-конференција со министерот за транспорт и врски, Благој Бочварски го презентираа буџетот за 2023 година,  кој изнесува околу 324 милиони евра, што е за 135 отсто зголемување.

Буџетската каса е проектирана за изградба на автопатот на Коридор 8 и Коридор 10Д, изградба на железница на Коридор 8, изградба и санација на локални патишта во општините, гасификација, водоводни и канализациски мрежи, субвенции за нови авиoлинии, како и подобрување на транспортот на граничните премини.

„И во време на пандемија и сега во услови на најголемата светска економско–енергетска криза интензивно работиме на изградба и реконструкцијата на главните патни делници во земјата. Тоа е нашиот приоритет и во наредната 2023 година. Најголемиот дел од буџетската каса на транспорт и врски, за наредната година, односно 308 милиони евра се наменети за реализација на капиталните проекти, што е за 163 отсто повеќе од оваа година“, рече Ковачевски.

„Очекуваме следната година да заврши изградбата на автопатот Кичево-Охрид и веќе во јануари 2024 година да можат граѓаните, сите ние да возиме по тој автопат. Активно продолжува изградбата на експресниот пат Ранковце-Крива Паланка, третата лента на патот Паланка-Деве Баир. Наредната година треба да почне изградбата на автопатските делници Ќафасан-Струга-Требениште, Букојчани-Гостивар, Гостивар-Тетово и Коридорот 10Д Прилеп-Битола. Активно ќе се работи и на изградбата на експресниот пат Градско-Дреново, Дреново-Фариш, Скопје-Блаце прва фаза, Битола-Меџитилија и други автопатски делници“, изјави тој.

Во рамки на Коридорот 8, со предлог буџетот за транспорт и врски, 33 милиони евра се предвидени за изградба на железницата на овој Коридор. На крајот на октомври, пак, почна изградбата на источниот дел од железничкиот Коридор 8 низ Северна Македонија – делницата Куманово-Бељаковце-Крива Паланка. Со тоа ќе се воспостави поврзување со пристаништата во Бургас и Варна во Бугарија и пристаништето Драч во Албанија.

„Војната во Украина покажа дека е нерационално да се потпираме само на еден извор на енергија, и затоа изградбата на национален гасоводен систем, неговото поврзување со регионалните гасоводни системи, како и изградбата на дистрибутивни системи за природен гас е еден од приоритетите“, рече Ковачевски.

Владата на последната седница, во врска со тоа прашање, извршила дополна на буџетскиот распоред со цел да финансира донесување урбанистички план за Интерконективниот гасовод Северна Македонија – Грција. „Тоа ќе биде гасовод што го поврзува системот за пренос на гас на Северна Македонија со грчкиот Национален систем за пренос на природен гас во Неа Месимвриа“, објасни премиерот.