Премиерот Димитар Ковачевски и министерот за земјоделство, шумарство и водостопанство Љупчо Николовски, денеска го презентираа новиот буџет на Министерството за земјоделство, шумарство и водостопанство за 2023 година.
Ковачевски притоа рече дека следната година секторот земјоделство ќе го има најголемиот буџет со кој се реализира најголемата земјоделска реформа за промена на моделот за субвенционирање, и тој претставува основа за понатамошен развој на земјоделството.
„Вкупниот предлог буџет за 2023 за поддршка на земјоделството, во кој што се опфатени сите институции кои учествуваат во развојот на овој сектор, е во износ од 193 милиони евра што претставува зголемување за 45 милиони евра споредено со 2022. Буџетот треба да обезбеди сигурност, стабилност и основа за развој на земјоделството“, соопшти тој.
Најголем дел од средствата се во Агенцијата за финансиска поддршка во земјоделството и руралниот развој, каде што има и најголемо зголемување. Во 2023 година, Агенцијата ќе располага со 140 милиони евра од кои 114 милиони евра се наменети за исплата на субвенциите и спроведување на најголемата реформа во земјоделството.
Ковачевски посочи дека средствата ќе бидат насочени кон авансна исплата на субвенциите и навремена исплата на сите субвенции, зголемено домашно производство на храна, капитални инвестиции и модернизација на македонското земјоделство.
Земјоделците, рече тој, ќе имаат авансна исплата на субвенциите. Ќе ги добиваат парите тогаш кога им се најпотребни, да можат навреме да се подготват за новата производствена сезона.
„Дополнителна поддршка добиваат оние земјоделци кои ќе се насочат кон производство на стратешките култури, со користење на сертифицирано семе и производот ќе го предадат кај регистрирани капацитети или земјоделски задруги. Дополнителна поддршка е предвидено и за земјоделците кои од своето производство создаваат финален производ за продажба“, најави премиерот.
Во поглед на инвестициите во земјоделство тој се осврна на Браната Конско во вредност од 40 милиони евра, чија што изградба започна пред три и пол години и завршува во првиот квартал од 2023 година. „Ова е најголемиот капитален проект за водоснабдување во последните 50 години“, вели Ковачевски. Следната година, како што нагласи, завршува изградбата на хидросистемот Равен-Речица во вредност од 15 милиони евра. Продолжува и изградбата на Браната Речани, како и реализацијата на Програмата за наводнување која вклучува изградба на четири системи за наводнување во рамки на речниот слив на Река Вардар, почеток на изградба на браната на Река Слупчанска.
„Не можеме да зборуваме за развиено земјоделско производство, ако немаме современи откупни и дистрибутивни центри. Следната 2023 година почнува изградба на двата откупни центри во Струмица и Ресен и на „Агрофуд платформата“ во Скопје, преку проектот за модернизација на земјоделството финансиран од Светка банка“, изјави шефот на Владата. Со овој проект, кој е во вредност од 50 милиони евра, како што рече, се обезбедува сигурен и организиран пласман за земјоделските производи, како и безбедни синџири на снабдување со здрава храна за нашите граѓани.
„Нашата крајна цел е да имаме повеќе домашна храна, да не зависиме од увоз, да создадеме модерно и конкурентно земјоделско производство, со мотивирани и задоволни земјоделци“, рече тој.