Премиерот Димитар Ковачевски и неговиот заменик за европски прашања Бојан Маричиќ, се сретнаа со Карен Донфрид помошник државна секретарка на САД за европски и евроазиски прашања, како и со нејзиниот заменик Габриел Ескобар кој е специјален претставник за Западен Балкан и со американска делегација, придружувана од амбасадорката на САД во земјава, Кејт Мари Брнз.

На состанокот е заеднички истакнато значењето на стратешкото партнерство на Северна Македонија со САД.

Помошник државната секретарка на САД Донфрид, пренесе порака дека Северна Македонија е важен трансатлантски партнер на САД. Изразена е силна поддршка од администрацијата на американскиот претседател Џо Бајден за развојот и европските интеграции на Северна Македонија и за итно и неодложно отпочнување на преговорите со ЕУ, како прашање од стратешка важност за стабилноста на целиот Западен Балкан.

Со ефективните политики за поддршка на народот во Украина и во согласност со надворешната политика на НАТО и на ЕУ, Северна Македонија како што е оценето, даде уште еден силен аргумент дека припаѓа во НАТО и во Европската Унија.

Заеднички е констатирано дека ова треба да биде препознаено и вреднувано од ЕУ, со отворање на преговорите за Северна Македонија и Албанија, бидејќи проширувањето на ЕУ со Западен Балкан е безбедносно прашање и е од суштинско значење за стабилноста и просперитетот на целиот регион и на Европската Унија.

Ковачевски се заблагодари за традиционалното, искрено и континуирано пријателство на САД од независноста на нашата држава до денес и го оцени како исклучително важно во сите процеси на развојот на нашата држава, вклучувајќи го и остварувањето на двете државни стратешки цели, НАТО и ЕУ.

На состанокот е разговарано за повеќе актуелни прашања, како што е значењето на иницијативата Отворен Балкан што ја унапредува регионалната соработка.