Како што знаете во првите недели од нашите мандати почнавме со нов дијалог кој се заснова на прашања кои гледаат кон иднината, и затоа создадовме работни групи и веќе добиваме резултати, рече денес премиерот Димитар Ковачевски на прес-конференцијата во Софија каде што учествува на состанокот на шефови на влади на земјите членки на НАТО од Југоисточна Европа.

Ковачевски рече дека меѓу двете држави се одвиваат практични проекти меѓу компаниите и граѓаните, има подобрена комуникација меѓу нашите образовни институции, имаме оперативна авиолинија меѓу Скопје и Софија. „Министерствата за надворешни работи на двете земји работат и се на ниво на размена на идеи и документи, но се уште нема конечен документ за кој што сме договорени. Штом се случи тоа ќе споделиме“, рече тој.

„Комуникацијата меѓу две земји мора да се заснова на соработка, взаемно разбирање, доверба и почитување. Така треба две земји да комуницираат меѓу себе. Како и секогаш ќе има маргинални групи на двете страни кои не сакаат дијалог во добра насока, но сега имаме добра комуникација и имаме медиуми каде што доминираат вести за соработка која е присутна меѓу двете земји“, рече премиерот Ковачевски. „Комисиите работат независно од политичкиот дијалог. Тие ќе ја забрзаат својата работа и штом дојдат до заклучоци ќе ги споделат“, додаде тој.

На прашањето дали можете да го кренете ветото во јуни оваа година, бугарскиот премиер Кирил Петков рече дека и денеска со Ковачевски дискутирале на на оваа тема. „Сакам да пратам порака до македонскиот и бугарскиот народ дека со Димитар работиме многу координирано и фокусирано, со временски рамки, си поставивме одредници. Северна Македонија припаѓа во семејството на ЕУ и тоа што е можно побрзо сакаме да постигнеме резултат“, рече тој.

„Но како што сите знаеме поставивме од наша страна одредници за заштита на правата на малцинствата. Во блиска координација сме со европските партнери, очекуваме специфичен јазик кон кој заедно ќе работиме во текот на преговорите и се надевам дека ќе го постигнеме тоа“.

Петков нагласи дека односот меѓу Македонија и Бугарија сега значително е подобрен. „Имаме заедничка цел и со оваа криза во Украина, Западен Балкан треба да биде што постабилен а дел од таа стабилност е пристапување на Северна Македонија и Албанија кон ЕУ. Работиме вредно, имаме состаноци, во следните неколку недели ќе забрзаме. Имаме добри вести од соработката меѓу министествата, и од Комисијата за историја. Некои работи беа тешки да се надминат, но сега има добри шанси за надминување. Оптимист сум дека ќе постигнеме се што зацртавме со Димитар, што е можно поскоро“, истакна бугарскиот премиер Петков. (С.К.)