Европски Со највисоки државни почести претпладнево во Брдо кај Крањ е пречекан премиерот Димитар Ковачевски од неговиот словенечки колега Роберт Голоб со што започна неговата официјална посета на Словенија.
Двајцата премиери во моментов имаат тет-а-тет средба на која во фокусот на разговорите е билатералната соработка меѓу двете држави, евроинтеграцијата на Северна Македонија, актуелните регионални и меѓународни прашања меѓу кои и војната во Украина и сојузништвото и обединетоста околу ова прашање, јави известувачот на МИА.
Ковачевски и Голоб ќе потпишат и заедничка декларација за зајакната соработка меѓу двете држави што се оценува како уште една јасна потврда на долгогодишното и цврсто пријателство меѓу Северна Македонија и Словенија и патоказ за натамошната соработка.
Во состав на македонската делегација е и министерот за земјоделство, шумарство и водостопаство Љупчо Николовски, а од словенечката делегација е вицепремиерката и министерка за надворешни работи Тања Фајон со која подоцна премиерот Ковачевски ќе има средба.
Според агендата, попладне премиерот Ковачевски во претседателската рециденција ќе се сретне и со претседателката на Словенија, Наташа Пурц Мусар.