„Новата енергија и динамика во односите со Бугарија, низ работата на првите средби на работните групи, стави на маса многу проекти и можности за соработка“, рече премиерот Ковачевски во интервју за Националната радиотелевизија.
„Наместо комуникација која што беше сведена на обвинувања, на говор на омраза, на настапи на пропагандисти, кои не доликуваат на односите меѓу две земји, договоривме многу конкретни иницијативи во кои ќе бидат вклучени стопанските комори, бизнис заедницата за да се зголеми економијата и другите области. Поставени се дури и рокови, како на пример да имаме видлив напредок во изградбата на железницата на Коридорот 8 до 2027 година. Тоа е амбициозен, но остварлив план“, истакна претседателот на Владата во интервјуто за јавниот радиодифузен сервис.
Тој додаде дека во комбинација со патниот дел од Коридорот 8, и знаејќи дека во Северна Македонија тој се сече со Коридорот 10, се отвораат сериозни перспективи за економијата на двете земји, како и за сите други земји од регионот и заради излезот на двете мориња, Црното и Јадранското море во Албанија.