Во изјавата за медиуми, Ковачевски посочи дека во текот на денот ќе оствари средби со повеќе државници присутни на вториот Самит на Европската политичка заедница како средба со премиерката на Данска, премиерот на Молдавија и други.
Дополнително, во одговор на новинарско прашање тој повтори дека стратешка цел на државата е полноправното членство во ЕУ до 2030 година и дека скрининг процесот треба да заврши многу скоро. Истакна дека земјата ја очекуваат политички одлуки со кои ќе се овозможи отворање на кластерите и поглавјата. Северна Македонија, рече тој, покажа дека низ дипломатија и тешки одлуки успеа да стане земја членка на НАТО, со отпочнати преговори со ЕУ и земја претседавач со ОБСЕ, фактор на стабилност во регионот.
Ковачевски изјави и дека Европската политичка заедница не е замена за процесот на интеграција, туку напротив заедница која ќе обезбеди подобра соработка на целиот регион во надминување на предизвиците од руската воена агресија врз Украина.
„Сега е отворена вратата за интеграција во ЕУ со оглед на геополитичкиот момент во кој се наоѓа Европа и тој момент треба да се искористи“, рече тој.
„Исто така имав состанок со претседателот на Франција на кој разговаравме во детали за процесот кој следи, го информирав за тоа дека се започнати уставните измени, практично предлогот на иницијативата е направен од работната група, доставен до Министерството за правда, ќе биде доставен до Владата, кој подоцна ќе оди во Парламент. Пред тоа јас ќе имам состанок со претседателот на најголемата опозициска пратија ВМРО – ДПМНЕ и нивниот тим на кој ќе го споделиме планот, со тоа сметам дека кај нас има капацитет како што и досега имало да се донесат вакви одлуки кои ќе овозможат подобра иднина за нашите граѓани“, подвлече Ковачевски.
Тој додаде и дека „по јасната порака на американскиот сенатор Марфи и амбасадорите во државата, вклучувајќи ја тука и американската амбасадорка, холандскиот амбасадор во делот на интеграцијата на државата“, на сите во нашата држава им е јасно дека имаме предлог преговарачка рамка доставена од 27 земји членки на ЕУ, и дека она што претстои пред нас е вклучување на други делови од народи во нашиот Устав, вклучително и бугарскиот народ.
„Со тоа сметам дека се постигнува уште една многу значајна цел, бидејќи конечно веќе ќе се стави крај на онаа теза којашто беше дека се работи за еден народ во две држави, за прв пат ќе имаме во Уставот и Македонци коишто се веќе, меѓутоа тука сега ќе бидат јасно диференцирани и Бугарите со што таа теза веќе еднаш засекогаш ќе заврши и нема да биде тема на разговор“, рече Ковачевски.
С.К.