Справувањето со енергетската и здравствената криза и подобрување на животниот стандард на граѓаните ќе биде фокусот на новата Влада предводена од мандатарот Димитар Ковачевски.
Ковачевски претпладнево новиот владин кабинет го претстави пред претседателот на државата Стево Пендаровски во Вила Водно.
По средбата премиерот Ковечевски зборуваше за трите приоритети на Владата, меѓу рече оти силен фокус ќе биде ставен на евроинтегративниот процес.
„Клучен прв приоритет е справување со енергетската криза, која што е светска криза, но се чувствува и во Северна Македонија. Втор приоритет е задржување и подобрување на животниот стандард на граѓаните и поддршка на компаниите во светло на економската криза која произлегува од енергетската криза. Трето е исполнување на целите во однос на големите инфраструктурни проекти кои што се веќе одобрени во буџетот за 2022 година“, рече Ковачевски додавајќи дека евроинтеграциите како стратешка цел остануваат меѓу врвните приоритети.
Тој најави соработка со граѓанските здруженија и со опозицијата.
Прашан со какви позиции ќе настапи на утрешната посета со неговиот бугарски колега Кирил Петков, Ковачевски вели дека ќе се разговара за проекти кои значат подобар живот за граѓаните на двете држави.
„Доминантно утре ќе зборуваме на теми од областа на економијата, од областа на инфраструктурата, образованието, иновациите, поддршката на евроинтеграцискиот процес на Република Северна Македонија, се она што ќе значи зголемена размена на трговија, зголемена размена на идеи. И ќе успееме да го поставиме дијалогот на едно ниво кое гледа кон иднината. Во однос на историските прашања, јас од секогаш сум кажувал дека тие треба да бидат дел од дебатата на историчарите, а дека довербата помеѓу граѓаните треба да се гради на позиции коишто значат подобар стандард за нив и како да дојдеме до тоа“, рече Ковачевски посочувајќи дека позициите на Владата се кристално јасни дека во Северна Македонија живеат граѓани кои зборуваат македонски јазик и имаат свој засебен идентитет.
Во однос на малцинските права, тој го повтори ставот на Владата дека Северна Македонија нема да се меша во внатрешните прашања на своите соседи.
„Ние имаме различно уредување од Бугарија. Колективните права кај нив се обезбедуваат поединечно, кај нас со оглед на мултиетничкиот карактер на нашата држава, колективните права се остваруваат колективно и почитувајќи ги сите меѓународни договори, сите граѓани можат своите права да ги остваруваат во рамки на Судот за човекови права во Стразбур“, рече Ковачевски.
(Б.Б.)