По триесетдневен пост, верниците од исламска вероисповед денеска го слават Рамазан Бајрам. Честитките за овој верски празник почнуваат по завршување на Бајрамската молитива која оваа година како резултат на пандемијата со ковид-19 ќе се одвива под мерки и упатства дадени од страна на здравствените власти за носење на заштитна маска и почитување на физичка дистанца од минимум 1,5 метар.
Слични препораки до имамите и советите на џамиите упати и Исламската верска заедница (ИВЗ), која донесе одлука оваа молитва годинава да не трае повеќе од 15 минути, односно при присуство во џамиите верниците да ги почитуваат дадените упаства. Како првевенција од ширење на коронавирусот и почитување на физичката дистанца, за Бајрамската молитва се апелираше да се користат дворовите на џамиите.
Ограничено време за честитки на Рамазан Бајрам
Баклавата и слатките кои се синоним за Рамазан Бајрам, оваа година се очекува да се служаат само на потесниот дел од семејството. Пандемијата со ковид-19, стравот кај верниците за проширување на коронавирусот и одлуката на Владата за полицискиот час денеска да почне во 11 часот ќе бидат главна пречка за посети на поширок круг на роднини и пријатели. Освен здравствените институци, и имамите и оџите упатија апел до верниците за редуцирање на бројот на посети на овој голем ден за муслиманите, се со цел да се заштити здравјето на граѓаните.
Бајрамска молитва во Косово ќе нема, во Албанија да
Како во време на месецот Рамазан, така и за Бајрамската молитва, џамиите во соседно Косово нема да бидат отворени. Муслиманите таму, за разлика од другите години, молитвата за Фитр Бајрам ќе треба да ја прават дома. Реисулот на ИВЗ на Косово, Наим Трнава на последната средба со Министерот за внатрешни работи, Џелал Свечла, изјави дека тие како најголема верска заедница ќе ги почитуваат мерките за побрзо надминување на епидемијата од ковид-19.
Во Албанија, пак, долгогодишната традиција на извршување на Бајрамската молитва на главниот плоштад на Тирана, оваа година нема да се реализира. Верниците од исламската вероисповед оваа молитва прв пат по многу години, Бајрамската молитва ќе ја вршат внатре во џамиите.
Турција и Саудиска Арабија во „Бајрамски карантин”
Светите муслимански места Мека и Медина во Саудиска Арабија по многу векови, молитвата на Рамазан Бајрам ќе ја обавуваат без вообичаното присуство на поголем број верници. Освен забраните за странски лица да патуваат во оваа земја, саудиските власти донесоа одлука од 23 до 27 мај да се воведе целосен карантин. Минатата година бројот на верници кои одлучија да го прослават празникот Рамазан Бајрам во овие две свети места надмина над еден милион.
Забрана за одвивање на Бајрамската молитва донесе и Дијанетот на Турција. Во нивното соопштение до јавноста се вели дека иако нема да има верници во џамиите, од минарињата на џамиите ќе се слушаат молитви и текбири (величење на Алах) на разглас.