Ковид кризата во Индија е на катастрофално ниво во последните две недели. Нови рекордни бројки на Корона вирус случаи се регистрираат скоро секој ден: на 22ри април, во само еден ден регистрирани се 314,835 случаи, а од тие 2,104 се смртни случаи – просекот на смртни случаи претходната недела беше 1,648 дневно што значи дека смртноста сега е значајно зголемена.
Вчера во Индија беа регистрирани 368.147 нови случаи на Ковид-19, и ова е 12-ти ден по ред како бројот на новозаразени не се спушта под 300.000. Многумина сметаат дека овие бројки се дури и ниски и дека многу од новите Корона случаи воопшто не се регистрирани.
Оваа криза се должи на повеќе фактори меѓу кои се олеснувањето на Ковид мерките во последните 2 месеци, но и недоволни залихи на кислород како и недостиг на вакцини.
Во март, милиони луѓе од Хинду религијата се собраа на бреговите на реката Ганг на религиозниот фестивал Кумб Мела, и покрај веќе зголемените случаи во земјата. И изборите во Индија поминаа без претпазливост, честопати со големи митинзи предводени од политички партии, вклучително и десничарската БJП на премиерот Нарендра Моди, кои привлекоа голем број поддржувачи кои во генерално не носеа маски, допринесувајќи до дополнително зголемување на борјките. Сѐ ова се случуваше само 2 месеци по наводната победа на Индија врз вирусот.
Иако Индија имаше добри резултати околу кризата, сега само нешто повеќе од 10 вакцини се администрирани на 100 луѓе во Индија, во споредба со 71 во Велика Британија и 70 во САД. Оваа огромна разлика покажува колку е светот далеку од вакцинациската еднаквост за која би требало сите да се залагаме. Заради критичната состојба, некои држави ветија дека ќе донираат вакцини на Индија. На пример, по телефонски разговор помеѓу американскиот претседател Џо Бајден и индискиот премиер Нарендра Моди, САД вети дека ќе донира 60 милиони дози од Астра Зенека вакцината на Индија. Мора да се напомене дека оваа вакцина не е одобрена за користење во САД што ја комплицира оваа донација на вакцините.
Некои експерти сметаат дека донациите на вакцини, како и масовната вакцинација нема да можат да го решат овој проблем на краток рок. Професорот по епидемиологија на заразни болести, Дејвид Хејман смета дека непосредениот фокус треба да биде на кислород, вентилатори и дексаметазон како алатки за ставање на пандемијата под контрола.
Сепак, на долг рок мора да се размислува за глобална масовна вакцинација како решение. Еден од најголемите проблеми околу оваа цел е фактот што COVAX системот преку кој би требало да се распределат вакцините на правичен начин не функционира многу добро за сега.
„Во март и април, COVAX системот достави 90 милиони дози помалку во 60 земји со најнизок приход,“ рече Сет Беркли, извршен директор на Гави, Алијансата за вакцини.
„Можеме да зборуваме за глобалниот империјализам и фактот дека Индија е најголемиот производител на вакцини во светот и е среќа што сме во оваа позиција каде индиските компании произведуваат вакцини,“ ми кажа Тања Шарма, мастерс студент на правни студии во Делхи. „Но, за жал, сепак сме зависни од меѓународните заедници за некои ресурси, како што видовме по повлекувањето на одредени суровини од страна на САД. Мислам дека она што САД го направија беше класичен глобален империјализам. Очигледно, тие отстапија и на крај ги испратија ресурсите бидејќи, сепак, позицијата на Индија влијае и на меѓународно ниво.“
„Но, јас би рекла дека најзначаен е проблемот со огромна системска слабост на здравството во кое долго време не се инвестира. Тоа е она што луѓето го истакнуваат, односно дека здравствениот систем од секогаш бил ваков, но дека сега кога тој систем влијае и врз богатите и привилегираните па затоа луѓето почнаа да зборуваат за тоа на меѓународно ниво,“ додаде Шарма.
Елена Гаговска