Цели 8 години траеше битката на Европската комисија (ЕК) со телефонските оператори за укинување на роаминг трошокот (трошок што се плаќа кога сте во странство и го користите мобилниот телефон за повици и интернет). Од денес, и на прагот на годишните одмори, ЕК може да се пофали дека ја добила најголемата битка но не и целата војна.
Денес официјално стапува на сила укинувањето на роамингот за сите корисници на мобилни телефони во земјите на ЕУ. За жал, тоа не се однесува за македонските корисници кои и понатаму ќе плаќаат поскапи сметки кога се во странство.
Ова ќе и, дозволи на Европјаните да ги користат мобилните телефони како да се дома. Но со одредени лимити.
Така на пример, ако еден Хрват е во Белгија и сака да телефонира во било која друга земја на ЕУ, ќе плати исто како да бил дома и се јавувал на хрватски телефон. Сепак, ако истиот Хрват од Хрватска се јавува на белгиски пријател, нема да има корист од ова укинување, односно ќе плаќа како и досега за меѓународни повици.
Преговори на ЕК со телефонските оператори траеја долго. Европските мобилни оператори долго не сакаа да чујат да загубат голем дел од нивните приходи со укинување на роамингот. Во 2012 година на пример трошоците на роаминг во ЕУ им донесоа на операторите 4.7 милијарди евра. Со текот на времето и на инсистирање на ЕК оваа сума се намалуваше.
Сепак, дури 36 европски оператори решиja да не ги послушаат советите на ЕК и ќе продолжат да го наплаќаат роамингот. Кај нив цената на роамингот е сведена на минимум и најавуваат дека мерката ќе биде само привремена и дека наскоро и тие ќе им се придружат на оние кои го укинуваат роамингот.
“Операторите имаа две години за да се подготват за крај на роамингот и се надеваме дека ќе ја искористат оваа шанса со примена на новите правила за да ги задоволат нивните корисници”, изјавија вчера во заедничко соопштение претседателите на Европскиот парламент Антонио Тајани, на ЕК Жан-Клон Јункер и претседавачот со ЕУ премиерот на Малта Џозеф Мускат.
Европските мобилни оператори ги предупредуваат нивните корисници нема да можат да ја користат оваа привилегија доколку патуваат во Македонија, Албанија и било која балканска земја. Укинувањето на роамингот не се однесува на нас Балканците.
Европскиот парламент најавува дека борбата со операторите ќе продолжи а крајната цел е целосно и тотално укинување на роамингот и на трошоците за меѓународни повици во целата ЕУ.