Скопското обвинителство побара истражна постапка против две лица за вршење изнуда. Тие со сила и со закана со мачета присилиле граѓанин да им даде 360.000 денари. Граѓанинот во 2021 година, од нив позајмил 55.000 денари, кои според устен договор требало да ги враќа со камата од 28.000 денари за секои 20 дена и за секој дополнителен ден доцнење уште по 1.000 денари. Врз основа на овој договор, во периодот од јануари 2022 до 09.05.2022 година, тој на лихварите им исплаќал парични износи од 120.000, 180.000 и 60.000 денари. Во целиот тој период осомничените, инаку вработени во агенција за обезбедување, телефонски му се заканувале дека ќе го убијат ако не ги врати парите. Во неколку наврати доаѓале и во неговиот дом, заканувајќи му се нему и на неговиот татко.

На 25 мај го повикале „должникот“ пред маркет на улицата „Македонско-косовска бригада“ и го однеле во мала уличка, при што го удирале, барајќи им веднаш да им ги врати парите. На 26 мај, пак, го повикале во катна гаража во Карпош, каде што работеле како обезбедување, па му побарале да им даде уште 300.000 денари. Кога тој кажал дека нема веќе пари, еден од осомничените извадил мачета, заканувајќи му се дека ќе му ги исече прстите и ќе го убие ако до крајот на денот не ги исплати парите. Го ставиле оштетениот во автомобил и заедно со него се упатиле кон Чаир, но биле пресретнати од полициски службеници.

Надлежниот јавен обвинител оцени дека постои опасност осомничените да побегнат или да влијаат врз сведоците и врз оштетениот или да го повторат делото, па побарал притвор. ​​