Гарден Гроув: Над 44.000 луѓе се евакуирани од повеќе места во јужна Калиорнија поради опасност од можна експлозија на резервоар со токсична хемикалија во воздухопловен погон во округот Оринџ, јавува Би-би-си. Властите предупредуваат дека оштетениот резервоар би можел да попушти, што, пак, мое да доведе до голема и опасна експлозија.
Командирот на противпожарната служба на округот Оринџ изјави дека во индустрискиот резервоар во погонот се наоѓаат околу 26.500 литри метил-метакрилат – многу испарлива и лесно запалива токсична хемикалија која се користи во производството на пластика.
Резервоарот ќе откаже, само не знаеме кога, изјави Грег Кови на прес-конференција, додавајќи дека ова е една од најопасните ситуации со кои се соочил во својата 32-годишна кариера.
Според властите, во постројката има три резервоари, а кај еден од нив дошло до дефект на системот за ладење.
Постојат две можни сценарија – резервоарот да протече и да ослободи илјадници литри опасни хемикалии, или да дојде до неконтролирано загревање и експлозија што би можела да ги зафати и околните резервоари со гориво и хемикалии.
Засега нема активно истекување ниту опасни честички во воздухот, бидејќи резервоарот е доволно разладен. Сепак, експертите предупредуваат дека метил-метакрилатот може да предизвика иритација на дишните патишта, кожата и очите, како и мачнина и вртоглавица.
Противпожарните екипи интервенирале во воздухопловниот погон на компанијата GKN Aerospace во градот Гарден Гроув по пријава за инцидент со опасни материи.