Советот за оценка на обвинителен акт на Кривичниот суд го прифати обвинителниот акт на Специјалното јавно обвинителство против Ѓоко Поповски во предметот „Триста“.
„Советот за оценка на обвинителен акт, во состав судија Верка Петковска како претседател на совет и судиите Горан Бошевски и Татјана Михајлова, постапувајќи во оценка на обвинителен акт на Јавното обвинителство за гонење кривични дела поврзани и кои произлегуваат од незаконското следење на комуникацииите (СЈО) со НСК – КО бр. 6/17 од 29.06.2017 година против обвинетиот Ѓ.П. донесе решение со кое приговорот на одбраната на обвинетиот се одбива како неоснован, а обвинителниот акт се одобрува во целост, соопштија денеска од Судот.
Посочуваат дека оценетиот обвинителен акт, согласно АКМИС – системот, електронски ќе биде распореден на судија за понатамошно постапување кој треба да закаже термин за одржување главна расправа по предметот, за што, како што велат, јавноста ќе биде навремено информирана.
Ѓоко Поповски, е обвинет дека како помошник министер во МВР ја злоупотребил службената должност при набавка на 300 полициски возила.
Ова е првото прифатено обвиненија од сите 17 кои СЈО ги поднесе во јули оваа година.