Кривичниот суд во Скопје му ги врати на СЈО барањата за определување мерки за претпазливост за четворицата осомничени во случајот „Трезор“, зошто доказите биле кодирани.
Доказите во судот биле доставени во електронска форма на УСБ, кое судиите на претходна постапка, не можеа да го отворат, бидејќи меморискиот стик е кодиран, соопштија од Кривичниот суд.
Службено лице кое во судот ги заведувало предметите го известило СЈО дека не може да се пристапи до наведеното УСБ бидејќи истото е кодирано, на што добиле усмен одговор од обвинителството дека доказите ќе може да се разгледуваат само и исклучиво во нивно присуство и дека само тие ќе имаат право да пристапат до нив.
„Нејасно е како судиите на претходна постапка треба да постапуваат по предлозите и да ги разгледаат доказите пред да постапат по нив, како би ги повикале странките, меѓу кои и овластениот обвинител, ако претходно не го разгледаат писмено образложениот предлог и основите што ги навел поднесувачот на предлогот, односно доказите, кое нешто е јасно предвидено во Законот за кривична постапка“, пишува во соопштението од судот.
Согласно ЗКП, објаснуваат од судот на Владимир Панчевски, во секој предлог на странките истите се должни, заедно со предлогот, да достават и правно релевантни докази, во соодветна писмена форма, врз основа на кои судот би можел да постапува и одлучува.
„Ова е преседан во досегашното постапување пред овој суд“, нагласуваат во соопштението.
На крајот соопштението завршува со прашање:
„Дали на ваков начин обвинителството се обидува да ги заштити лицата против кои го поднел предлогот, а вината за непостапувањето и одолговлекувањето на постапката, се обидува да ја префрли на судот, е нешто што треба да го одговори обвинителството“.