Кривичниот совет при Основниот суд Скопје 1 – Скопје го одобри обвинителниот акт за предметот на СЈО „Тендери“.
– Советот за оценка на обвинителен акт на Одделението за организиран криминал и корупција при Основниот суд Скопје 1 постапувајќи по обвинителниот акт на Јавното обвинителство за гонење кривични дела поврзани и кои произлегуваат од незаконското следење на комуникациите (СЈО) НСК – КО 10/16 означен како „Тендери“, донесе решени со кое го одобри обвинителниот акт, соопшти попладнево Кривичниот суд.
Оформениот предмет по одобрениот обвинителен акт согласно АКМИС – системот, како што велат од Судот, електронски ќе биде распореден за понатамошно постапување, а кога ќе биде закажан термин за одржување главна расправа јавноста ќе биде навреме информирана.
Случајот „Тендери“ што го отвори СЈО се однесува на изведување градежни работи на Музејот на македонската борба за државност и самостојност во Скопје, во кој првообвинета е поранешната министерка за култура Елизабета Канческа – Милевска.