Доналд Трамп се врати вчера во Вашингтон по една недела патување на Блискиот Исток и Европа. Но, во Вашингтон ќе мора да се соочи со кризата за руското мешање во американските избори која зема се поголем замав.
Овој пат во прашање е неговиот зет и советник за надворешна политика Џаред Кушнер. Според повеќе американски медиуми, Кушнер сакал да воспостави таен канал на комуникација со Кремљ за време на изборната кампања и да го заобиколи вообичаениот начин на комуникација помеѓу САД и Русија.
Според Вашингтон Пост, Кушнер ова му го предложил на рускиот амбасадор во САД Сергеј Кислиак и тоа се случило на 1 и 2 декември. Предложил да се искористат руските дипломатски згради за да се заштитат од секакво прислушување разговорите пред полагањето заклетва. Тие разговори требало да се заштитат од прислушувањата на американската влада. Весникот ги цитира разговорите на Кушнер и Кислиак кои биле прислушувани од разузнавачките служби на САД.
Претседателот на Советот за национална безбедност на САД генералот Х.Р. МакМастер изјави дека воопшто не е загрижен поради овие открија бидејќи, вели тој, САД има неформални канали на комуникација со многу земји за да може да се разговара на “дискретен начин”.
Ова ново откритие е уште еден удар врз Трамп кој пред извесно време мораше да се ослободи од претходниот претседател на Советот за безбедност Мајкл Флин токму поради тајни контакти со Русија. Освен тоа, и екс директорот на кампањата на Трамп Пол Манафорт е исто така под истрага на ФБИ.
Вашингтон е скандализиран поради овие откритија. Џон МалЛафлан, екс директор на ЦИА за време на Џорџ Буш, за една американска телевизија изјави дека “вакво однесување на еден офицер на американското разузнавање ние би го сметале за шпионажа”.
А екс директорот на американската агенција НСА Мајлл Хајден не криеше дека е едноставно вџашен:
“Каков ли степен на непознавање, хаотичност, ароганција, сомнеж и презир треба да имаш за да мислиш дека ваков контакт со рускиот амбасадор е добра идеја?”, изјави тој за Си-Ен-Ен.
Истрагата на ФБИ за руските врски на Трамп е сега во рацете на Роберт Мулер, обвинител познат како независен и човек кој не подлегнува на притисоци.
Самиот Трамп е осомничен дека вршел притисок врз функционери на ФБИ за да се сопре истрагата за руските врски.
Комисијата за разузнавање на Сенатот исто така има две истраги околу истото прашање. Сенатот побарал од екипата на Трамп да ги даде сите “документи, мејлови и телефонски снимки во врска со Русија од почетокот на изборната кампања во јуни 2015 година”, објави Њујорк Тајмс.
Кушнер е бизнисмен кој стана советник за надворешна политика. Тој има 36 години и е оженет за Иванка, ќерката на Трамп која исто така е советник во Белата куќа. Кушнер ја има сета доверба на Трамп и одврзани раце во работата.