Починатиот Коста Крпач кој вчера беше пронајден мртов во својот стан сведочел во Специјалното обвинителство за отворениот предмет „Тврдина“, дознава НОВА.
Тој доброволно се пријавил во СЈО, а како што дознава НОВА исказот бил во врска со незаконското уништување на два система за прислушување, со што државниот буџет е оштетен за околу 10 милиони евра.
Денеска и СЈО соопшти дека против Крпач не била водена никаква кривична постапка и тој немал својство на осомничено лице, туку на сведок. Оттаму велат дека соработката со него била беспрекорна.
Од СЈО посочија дека поседуваат докази за многу релевантни околности, вклучително и за притисокот под кој се наоѓал Крпач, но бидејќи се работи за исклучително доверливи информации тие не може да ги споделат во јавноста.
Сè уште се чека на извештаите од обдукцијата и вештачењето на куршумите и трагите во неговиот стан по што ќе се утврдува дали смртта на Крпач настанала со самоубиство или убиство.
Името на Коста Крпач се најде и на списокот на колективна аболиција на претседателот Иванов. Иако НОВА побара објаснување од Кабинетот на Иванов на која основа претседателот помилува лице против кое ниту се води постапка, ниту е осомничено, но се до објавувањето на овој текст оттаму не добивме одговор.
КОЈ Е КОСТА КРПАЧ?
Освен Крпач на листата на Иванов се наоѓаат и Владислав Стајковиќ и Христијан Панев – лица кои се поврзуваат со бомбата број 15, односно со набавката и митото за израелската опрема за прислушување.
Јанева веќе го побара случајот „Израелска опрема“ во којшто осомничен за поткуп е Сашо Мијалков, а вмешан е и Владислав Стајковиќ, но за овој предмет не е обелоденета истрага од Специјалното обвинителство.
НОВАТВ минатата година го истражуваше случајот со изреалската опрема, а дел од лицата и компаниите кои се споменуваа во прислушуваните телефонски разговори беа фокус и да други истражувачки стории на НОВАТВ, како и на проектот за истражување на медиумската сопственост „Медиапедиа“.
Меѓу сопствениците на фирмите на која легнувале пари за зделката со израелската опрема се наоѓа и Коста Крпач. Тој е академски сликар и се води како директор на компанијата „Финзи ДООЕЛ“ која сега е сопственик на веб-порталот „Нетпрес“.
Aко се погледне историјатот на фирмата „Финзи ДООЕЛ“, се гледа дека прв управител на фирмата во 2009 година бил Владислав Стајковиќ. Не се знае со што се занимава оваа компанија бидејќи до веб страницата www.finzi-mk.com пристап има само сопственикот. Како сопственик на „Финзи“ се води компанија од офшор дестинацијата Кипар.
За овој предмет СЈО се уште нема отворено истрага, па оттаму останува нејасно како Коста Крпач се најде на списокот на аболицирани лица.
МВР: КРПАЧ Е ПРОНАЈДЕН ПОЧИНАТ ВО СВОЈАТА СПАЛНА СОБА
Министерството за внатрешни работи тврди дека Коста Крпач бил пронајден починат во неговата спална соба, на станот кој се наоѓа во скопски Капиштец на улицата „Народен Фронт“, со прострелна рана во градниот кош.
Пред да настане смртта, тој испукал три куршуми во возило паркирано пред неговата зграда, кое било во сопственост на фирма за пиротехника „Огнометика“. Комбето било празно, а според МВР од се уште неразјаснети причини Крпач рафално ги испукал куршумите кон возилото.
Вчера, како што регистрираше и екипата на НОВА, полицицијата со часови се обидуваше да пробие во станот на починатиот.
Полициските и медицинските екипи уште вчера не терен посочија дека се работи за самоубиство, но од Обвинитлството велат дека тоа дополнително ќе се утврдува по наодите од обдукцијата и вештачењата на терен.
По наредба на Јавен обвинител телото на починатиот е предадено на обдукција.
Вчера во дел од медиумите се појавија шпекулации дека можно е Крпач сам да си пресудил, поради тортурата со која се соочил во Специјалното обвинителство. Од СЈО ги демантираа ваквите дезинформации и велат дека собаботката со него била беспрекорна.
-Соработката со сведокот беше беспрекорна и се работеше за исклучителна личност, така што веста за неговата смрт ги погоди сите вработени во ова Јавно обвинителство. Во оваа прилика, сакаме да изразиме длабоко сочувство до членовите на семејството на сега покојниот Коста Крпач.
Блиски познаници го опишуваат како исклучително повлечена личност.
Коста Крпач почина на 40 годишна возраст, а погребот ќе биде утре во 12 часот на градските гробишта во Бутел.