Општина Крушево ги интензивира активностите и работата на неколку големи проекти, а се најавува уште еден проект – дополнително зафаќање на извори на вода во населба Трстеник со што ќе се обезбеди водоснабдување на индустриската зона и дел од населените места. Покрај тоа, како што објави градоначалникот Томе Христоски, во тек се градежни работи и на повеќе локации во општината.
Реконструкција на улицата што води до хотелот Монтана и изградба на паркинг, тампонирање во дворот на училиштето и тампонирање на улица во село Борино, изградба на резервоари за вода во селата Јакреново и Пресил, санација на свлечиште на регионалниот пат Крушево – Демир Хисар, се дел од работите кои во моментов се одвиваат.
„Крушево е едно големо градилиште. После зимската сезона со многу снег, пролетта ја почнуваме интензивно со реализација на тековните проекти и најава за уште еден нов проект. Најавувам дека покрај инфраструктурата мој личен и приоритет на општината ќе биде привлекување на нови инвеститори“, вели градоначалникот.
Еден од поголемите проекти што исто така се најавува е и инвестицијата од 5 милиони евра за изградба на фотоволтаични електрани, објави првиот човек на Крушево.