Министерството за внатрешни работи објави дека ноќта на 16-ти јуни поради нарушени меѓусоседски односи, настанала физичка пресметка помеѓу двајца полнолетни и тројца малолетни жители од населбата Злокуќани општина Карпош при што на петмина им се нанесени значителни телесни повреди кои ноќта тие се пренесени во Ургентниот центар на клиничките болници „Мајка Тереза“.
По неколку часа таму пристигнале неколкумина припадници на другата од раскараните страни кои со тврди предмети ги нападнале роднините на повредените кои на клиниката дошле да се информираат за здравствената состојба на своите блиски.
Единицата за интервентна полиција при СВР Скопје на подрачјето на Центар од слобода ги лишила петтемина напаѓачи, во полициска станица биле приведени уште двајца, а на разговор се повикани и тројца малолетници исто така учесници во инцидентот.
Општина Карпош преку соопштение реагираше на синоќешен инцидент во населбата во Злокуќани. Такво насилие, крволочност, со употреба на лопати, секири, ножеви (за среќа извадениот пиштол не успеал сопственикот да го репетира), е незапаметено во историјата на Карпош.
Оваа масовна тепачка во ова населено место не е прва. Дел од ромската населба во Злокуќани станува гето, опасност за живеењето на жителите кои сакаат мирно да ги поминуваат деновите, но уште поопасно за граѓаните кои што гравитираат во тој дел како и фирмите кои што имаат имот во оваа населба. Готово да нема граѓанин кој што физички не е нападнат.
Не постои куќа или фирма која повеќе пати не е брутално ограбена, а сторителите се познати и на мештаните и на органите на прогон. За насилниците од оваа населба градоначалникот на општината повеќе пати изврши разговор со полициската станица Карпош и со Основното јавно обвинителство за да насилниците бидат санкционирани, затоа што овие луѓе не само што ги загрозуваат жителите на Злокуќани, туку и жителите на Бардовци и Влае 1, се вели во соопштението на општината. Општина Карпош бара од полицијата, обвинителството и судот, најстрого да бидат санкционирани учесниците во оваа нецивилизирана, преполна со агресија тепачка својствена на средниот век, а не на цивилизирана заедница како што е оваа општина.
Доколку овој немил настан не се санкционира соодветно, а границата е помината веќе со години, состојбата ќе биде уште полоша, а агресивните насилници ќе земаат се повеќе замав, се додава во соопштението на општина Карпош.