Итно формирање на Полиција за животни или Служба за превенција/евиденција/санкција на насилството бараат Здруженијата за заштита на животни, Анима Мунди, Асоцијација за заштита на животните и активистите кои секојдневно се грижат за бездомните животни во Македонија. Барањата за формирање на Полиција за животни доаѓа откако во петокот деца му фрлиле на бездомно куче петарда во уста.

„Насилството врз животните е индикатор за девијантно и болно општество. Ова е кутре кое е жртва на монструозно изживување, на кое деца му фрлиле петарда во устата. По 2 дена трагање по кучето кое се распаѓало од болка, сега е оперирано и потребна е помош за да се спаси. Македонија има итна потреба од Полиција за животни или Служба за превенција/евиденција /санкција на насилството на кое животните се изложени на секој чекор. Вакви ѕверства се толерираат во Република Македонија“, велат од Анима Мунди.

Од полицијата засега нема никаква реакција, ниту пак пријава за овој настан.

Кутрето кое е жртва на монструозно изживување, на кое деца му фрлиле петарда во устата е оперирано и потребна е помош за да се спаси.

„На наше инсистирање, со цел да му се спаси вилицата кучето е оперирано кај доктор Марин кој има вакви оперативни искуства и од претходно. Износот на операцијата е 7500, а секој ден престој е дополнителни 300 денари . Кој може и сака да донира нека ја контактира Мелиса 078 345 618. Воедно неопходно е негово постоперативно згрижување и ресоцијализација бидејќи е во шок“, пишуваат активистите.

Купувањето и продавањето пиротехнички средства е забрането со закон, а во текот на изминативе години многу деца завршија со повреди и изгореници од петардите кои им пукнале во раце.