Европската унија мора да обезбеди Србија да ги спроведе договорените активности на терен, изјави за новинарите косовскиот премиер Албин Курти по денешната владина седница.
Тој нагласи дека точката 7 зборува за правата на српската заедница, а не за формирање на Заедница на српски општини.
Курти рече дека не го засегаат изјавите на српската страна и оти Европската унија мора да обезбеди Србија да ги спроведе на терен договорите, вклучително и тој во Охрид.
„ЕУ вели дека тоа е договор, а имаме изјави од српска страна кои покажуваат дека нема намера да спроведе некои работи и дека се обидува да раскине некои договори. Но, ние не треба да се занимаваме со тоа. Сега ЕУ е таа што мора да се погрижи договореното да се имплементира на терен“, рече Курти.
Тој додаде дека медијаторот го контролира спроведувањето и дека ќе има последици за секое отстапување, деформација или прекршување на договорот.
Говорејќи за Заедницата на српските општини, премиерот на Косово повтори дека заедницата и општината не значат исто, коментирајќи ја изјавата на Мирослав Лајчак дека, меѓу другото, во точка 7 се зборува за спроведување на договорите од 2013 и 2015 година и задолжително формирање на Заедница на српски општини.
„Заедницата“ не може да се поистоветува со зборовите „Општина“ или „Здружение“. Во точката 7 од основниот договор се наведува одреден степен на независност на српската заедница. Се вели „Српска заедница“, а не „Општина“. Знаете, заедницата не е територијална категорија, општините се територијални и административни единици. Значи не е иста работа. Разбирам дека не се сосема различни, но не се ни иста работа. И во Собранието кажав дека од моја гледна точка, не само политички, туку и правен, кога велиме српска заедница, автоматски мислиме на рамковниот договор за заштита на малцинствата во рамките на конвенцијата на Советот на Европа. Ова е платформа, како што разбираме, и ние сме посветени на правата на заедниците, вклучително и на српската“, рече Курти.
Тој повтори дека има 39 потпишани договори и дека ниту еден нема приоритет. Курти тврди дека Србија инсистира на формирање на Заедницата на српски општини, но не го спроведува договорот, на пример, за враќање на катастарските книги и за признавање на дипломите.