Шефот на австриската дипломатија и претседавач на ОБСЕ Себастијан Курц кој вчера пристигна во Скопје изјави дека македонските политички партии треба сами да донесат одлука по изборите и да најдат излез од кризата.
„Партиите треба да донесат одлуки кои се носат по избори како и во другите држави, така и во Македонија. Австрија нема да се меша во натамошниот тек на настаните. Сакаме стабилност во оваа земја и се надеваме дека реформите и европскиот пат ќе продолжат“, изјави Курц по разговорите со неговиот македонски колега Никола Попоски. Двајцата претходно ја посетија македонско грчката граница кај преминот што го користеа мигрантите.
Во декември минатата година Курц се соочи со лавина критики откако дојде на големиот митинг на Коалицијата предводена од ВМРО-ДПМНЕ во Скопје. Му беше замерувано дека иако најавуван на државна посета кај неговиот колега Никола Попоски, тој беше говорник и на партискиот митинг што се протолку и како излегување од неговите ингеренции и како поддршка на власта.