Репрезентациите на Германија и на Англија, од топ фаворитите, со рутински победи во мечевите од петтото коло во квалификациите за фудбалскиот мундијал во 2018 година. „Панцерите“ со 4:1 го совладаа Азербејџан во Баку, „Гордиот албион“, пак, на „Вембли“ славеше над Литванија со 2:0.
Фудбалската претстава во Лондон со одличен и очекуван вовед. Капитенот на англиската селекција, Џо Харт го прекрши протоколот за сметка на детска среќа, па дозволи пред него да излезе Бредли Ловери, момче кое боледува од рак, заедно со неговиот идол Џермејн Дефо. Потоа следуваше едноминутно молчење во знак на почит кон жртвите од терористичкиот напад во престолнината на Островот по што почна и битката за бодови.
Кам-бек каков што можеше да посака имаше Дефо кој по четири ипол години повторно го облече националниот дрес. Беше повикан како замена за повреденот Хари Кејн од Тотенхем, а потегот на селекторот Герет Саутгејт да го уфрли во почетните 11 се покажа како исправен. Инспириран од приликата и амбиентот, токму напаѓачот на Сандерленд беше стрелец и на водечкиот гол за домашната селекција. Работата што тој ја започна во 22 минута, ја доврши Џејми Варди во 66. за осигурување на трите бода за лидерот во групата Ф.
Азербејџан на Роберт Просинечки беше на „седмо небо“ во само пола час против Германија и на кратко се понадева дека би можеле до сензационално реми. Моќниот ривал што го имаа против себе, сепак, се покажа како преголем залак за така големите желбени амбиции. Германците поведоа во 19 минута со голот на Ширле за Назаров во 31. да израмни на 1:1 и да биде причина за експлозија од радост на трибините.
Еуфорија на домашните траеше кратко. На разиграниот состав на Јоаким Лев му требаа само пет минути да ја врати предноста и да ги урне надежите за изненадување на Азербејџанците. До полувремето погодија Милер и Гомез, а Ширле, со својот втор гол на средбата, во 81 минута го комплетира петтиот триумф на Германија во исто толку одиграни средби во циклусот.
Црна Гора во Подгорица загуби од Полска со 1:2. Левандовски во 40 минута и Пишчек во 62. реализираа за Полјаците кои полека можат да размислуваат и за настапите во Русија наредното лето. Единствениот за Црногорците го постигна Мугоша во 63 минута.
Шкотска со 1:0 ја порази Словенија со Среќко Катанец и драстично ги оживеа надежите за учество на мунијалот. Голот за три бода за Шкотланѓаните беше дело на Мартин во 88 минута.
Квалификации за СП 2018
Резултати, 5 коло
Група Ц
Северна Ирска – Норвешка 2:0
Азербејџан – Германија 1:4
Сан Марино – Чешка 0:6
Табела: Германија 15, Северна Ирска 10, Чешка 8, Азербејџан 7, Норвешка 3, Сан Марино 0.
Идно коло (10 јуни): Германија – Сан Марино, Азербејџан – Северна Ирска, Норвешка – Чешка.
Група Е
Црна Гора – Полска 1:2
Романија – Данска 0:0
Ерменија – Казахстан 2:0
Табела: Полска 13, Црна Гора 7, Данска 7, Романија 6, Ерменија 6, Казахстан 2.
Идно коло (10 јуни): Полска – Романија, Црн Гора – Ерменија, Казахстан – Данска.
Група Ф
Англија – Литванија 2:0
Малта – Словачка 1:3
Шкотска – Словенија 1:0
Табела: Англија 13, Словачка 9, Словенија 8, Шкотска 7, Литванија 5, Малта 0
Идно коло (10 јуни): Шкотска – Англија, Литванија – Словачка, Словенија – Малта.