Пријавата за бомба во Македонскиот народен театар била лажна, информираат од МВР. Се проверува кој попладнево се јавил во билетарата на МНТ со лажна дојава за експлозив.
– МВР ги направи потребните проверки и утврдено е дека пријавата за напад е лажна. Се преземаат мерки за утврдување на пријавата и преземање на соодветни мерки и санкции против личноста која лажно пријавила. Им благодариме на граѓаните за трпението и на медиумите за професионалниот однос кон ситуацијата, информираат од МВР.
Како што веќе објавивме, вечерва беа блокирани сите улици во центарот на Скопје поради пријава за поставен експлозив во Македонскиот Народен Театар.
Полицијата постапи по пријава за напад, откако едно лице се јавило во 16:45 во билетарата на МНТ, а вечерва беа евакуирани и неколку објекти во центарот на Скопје, информираа од МВР.
– Станува збор за стандардни мерки на МВР по ваква добиена пријава и веднаш штом ги завршиме проверките и веродостојноста на информацијата ќе ја известиме јавноста соодветно. Апелираме граѓаните да останат смирени, а медиумите да ги пренесуваат официјалните и точни информации, соопштија од МВР.