Роналдињо, Едгар Давидс, Хуан Себастијан Верон, Тоти и многу други легенди на фудбалот одиграа заедно со еден од најголемите, Диего Армандо Марадона на синоќешниот ревијален „Натпревар на мирот“ организиран од страна на поглаварот на Римокатоличката црква, Францис.
Натпреварот се одигра на Стадио Олимпико во Рим, а вниманието беше насочено кон богот на фудбалот, Марадона, бразилскиот феномен Роналдињо и легендата на Рим, Франческо Тоти.
Овој натпревар папата го организираше само неколку дена откако Ватикан организираше меѓународен семинар за спортот и верата.
Марадона пред натпреварот порача дека иако не бил во најдобра форма, заиграл бидејќи го поканил самиот папа.
– Тој прави добра работа. Се оддалечив од црквата на одредено време но тој ме натера повторно да верувам. Ни треба мир насекаде низ светот во овие времиња.
Пред самиот натпревар, папата Францис, порача дека преку спортот се гради и култура на мирот на светско ниво.
– Еден спортски натпревар содржи голема симболика и помага да се изгради култура на мир во светот во кој луѓето со различни религиски убедувања го зачувуваат својот идентитет а живеат во заедничко почитување, изјави Папата.
Екипите во натпреварот се водеа како 11-те на Ла Лига против Остатокот од светот а заврши со 4-3 за Ла Лига.