Денес напладне почна протестот на матичните лекари на кој присуствуваа над двеста здравствени работници – матични лекари, стоматолози, специјалисти, медицински сестри и лаборанти.
На протестот зборуваше министерот за здравство Беким Сали и се обиде да им додели благодарници на лекарите по повод Светскиот ден на здравјето 7 Април, но лекарите не ги прифатија и му ги вратија благодарниците.
Претседателката на Здружението на приватни лекари, д-р Лили Чолакова Дервишова, рече дека министерот за здравство кој доаѓа од примарната здравствена заштита е последна надеж за спас на лекарите од тој сектор.
„Очекуваме корекција на капитациониот бод годинава, а в година и промена на моделот на плаќање“, изјави Чолакова и додаде дека „бодот пред четири години бил зголемен на 63 денари по пациент и оттогаш не добиваме никакви средства плус, а сѐ е поскапено, гориво, струја, животни трошоци“.
Лекарите преку мирниот протест побараа да се смени и начинот на препишување лекови за хронично болните пациенти и на позитивната листа да се воведат нови лекови. Тие предлагаат и да се најде нов начин на плаќање на лекарите во примарното здравство и на лабораториите.
Честитајќи им го Светскиот ден на здравјето, министерот Сали рече дека барањата на лекарите се прифатливи, но нагласи дека во Буџетот за годинава не се предвидени средства за покачување на капитацијата.
– Претставниците на здруженијата знаат дека работиме на нов модел на финансирање на примарната здравствена заштита. Сметам дека денешниот ден е за одбележување на Денот на здравјето, а не за протестирање, изјави Сали и додаде дека засега работат на три можни модели за промена на начинот на кој се исплатуваат матичните лекари.
Матичните лекари и стоматолози бараат зголемување на капитациониот бод кој сега за лекарите е 63 денари да биде 90 денари, а на стоматолозите е 48 денари и се бара и тој соодветно да им се зголеми. Реагираат и дека Фондот за здравство им ги игнорира барањата веќе четири години. Апелираат дека само 13 педијатри работат во примарното здравство, а дека повеќе од 10 години нема стратегија за развој на здравството.
Договорено е работни групи од Министерството и здравството од идната недела да почнат да ги разгледуваат барањата и да ги решаваат проблемите.
(Љ.Б.)