Лекарката од скопската клиника за гинекологија на чие дежурство починаа четири новороденчиња, а таа не беше на работното место во тој момент, следните шест месеци ќе зема 30 отсто помала плата и ќе работи само прва смена под надзор на друг специјалист, а привремено и е стопирана субспецијализацијата за неонатологија што и ја плаќа Клиниката.

Ова е одлуката на дисциплинската комисија за која денеска информираа од комисијата, а е прифатена од страна на директорката на директорката на Клиниката за гинекологија и акушерство, Викторија Јовановска.

– Ја прифатив одлуката на дисциплинската комисија со која се согласувам. Одлуката на дисциплинската комисија е дека докторката е казнета парично максимално и одземена и е субспецијализацијата во тој период. Овие шест месеци, додека е казнета, ќе работи само од изутрина, под надзор на колеги и нема право да дежура во некоја друга установа. Ова е конечна одлука, изјави денеска Јовановска.

Членот на дисциплинската комисија, Сашо Стојчевски рече дека одлучиле со мнозинство гласови да се прифати оваа казна која е практично заснована на статутот на Клиниката за гинекологија и акушерство и Законот за здравствена заштита.

Тој посочи дека не била утврдена стручна одговорност кај докторката од посебната комисија на Министерството за здравство која ги испитувала сите случаи на четирите смртни случаи на новороденчиња.

– Стручна одговорност кај докторката нема и одлуката се темелеше само на дисциплинската одговорност. Прекршокот е утврден, казната е доставена согласно прописите и законот. Сметаме дека ова би требало да биде соодветна казна на колешката која го има направено овој дисциплински пропуст, односно прекршок, додаде Стојчевски.

Од Клиниката информираат дека додека била на дежурство докторката направила два прекршока: го напуштила работното место без да побара замена и не се појавила на породување со царски рез.

Инаку, ова не било првпат лекарката да излезе за време на дежурство за приватни потреби. Раководството на Клиниката барало построга казна, но Синдикатот застанал на нејзина страна. Од Клиниката велат дека сега таа е под надзор и доколку ова се повтори таа може да добие отказ.

ВИДЕО:Вистината за енормната смртност на новороденчиња на гинекологија