За само 71 ден, ДПМНЕ отвори четири нови должнички фронтови во вкупна вредност од 333 милиони евра. На 26 мај, парламентарното мнозинство изгласа задолжување од 260 милиони евра кај странски банки; во јули Владата извлече седум милиони евра од М-НАВ за да ја крпи ликвидноста на ЈП за државни патишта; на 29 јули се одлучи на заем од 25 милиони евра кај Светска банка, а на домашниот пазар издаде тригодишни и петнаесетгодишни обврзници од над 41 милион евра, со камати до 5,20%. Тоа е темпо од 4,7 милиони евра дневно и по еден нов должнички потег на секои осумнаесет дена, додека следната аукција веќе е најавена за 18 август. Македонија со Мицкоски функционира како зависник од брзи кредити – уште не е исушено мастилото од претходното задолжување, а државната рака веќе е испружена кон следниот доверител, пишуваат од партијата Левица.
Должничката сметка за две години мандат веќе надмина три милијарди евра кредитни операции. Започна со една милијарда евра унгарски кредит, издаде еврообврзница од една милијарда евра, зема уште 260 милиони од странски банки, ја отвори заемската компонента од Планот за раст, натрупа проектни кредити и гаранции и продолжи со домашни емисии. Во оваа сума воопшто не е пресметана британската рамка од до пет милијарди фунти. Мицкоски ја претвори Македонија во експериментален полигон за кредитори, унгарски банки, меѓународни фондови, домашни обврзници и државни компании – секој добива парче од идните буџети на граѓаните.
Цената на оваа кредитна зависност веќе се наплаќа секоја секунда. Само во 2026 година државата ќе исплати 346 милиони евра за камати, речиси 948 илјади евра дневно, 39.500 евра на час, 658 евра во минута и околу 11 евра во секоја секунда. Ако едно ново училиште чини околу три милиони евра, само годишната камата е еднаква на 115 нови училишта, додека последните 333 милиони евра одговараат на уште 111 такви објекти. Каматите се речиси седум пати поголеми од целата програма од околу 50 милиони евра за реконструкција на државните студентски домови. Додека родителите молат за место во градинка, учениците седат во дотраени училници, студентите живеат во распаднати домови, а болниците собираат донации за основна опрема, доверителите на Мицкоски секој ден инкасираат речиси еден милион евра.
Владата ја нарекува оваа состојба “буџет во добра кондиција“, додека врши финансиска рација и по сите државни каси во кои останала готовина. Јавниот долг од 8,87 милијарди евра при преземањето на власта стигна до околу 10,73 милијарди – раст од 1,86 милијарди евра или речиси 21%. Тоа е просечно зголемување од околу 2,5 милиони евра дневно, додека годинава доспеваат уште 1,56 милијарди евра главнина и камати.
Левица бара итно објавување на единствен и целосно проверлив регистар на сите задолжувања, обврзници, гаранции и позајмици со износот, каматата, провизиите, рокот, грејс-периодот, конечната цена и точната намена на секое евро, како и договорите кои сѐ уште се држат во тајност. Народот има право да знае колку од новите кредити создале нови болници, училишта, градинки и работни места, а колку завршиле во затворање стари дупки, предизборно пумпање на неспособните вмровски градоначалници и купување политички мир. ДПМНЕ ги троши парите во еден мандат, ги растегнува ратите до 2041 година и на секое македонско семејство му остава невидлива фактура. Мицкоски ќе ја напушти функцијата, а неговите камати ќе останат да живеат со народот“, соопшти партијата Левица.