За декретот на американскиот претседател, Џо Бајден, со којшто на „црна листа“ се ставаат противниците на Преспанскиот и Охридскиот договор, поранешниот шеф на дипломатија и пратеник во Собранието од ВМРО-ДПМНЕ, Антонио Милошоски, изјави дека станува збор за рамка која се дефинира периодично и со која САД ги штити своите национални интереси.
– ВМРО-ДПМНЕ како партија има задача и обврска да ги штити македоснките национални и државни интереси. Ставот на ВМРО-ДПМНЕ за Преспанскиот договор е следен: ВМРО-ДПМНЕ не учествуваше во преговарањата, креирањето, неговото носење во Собранието и негова имплементација, истиот е асиметричен и спротивен на македонските национални интереси – изјави Милошоски за „Слободен печат“.
И партијата Левица на својот Фејсбук профил објави дека „ќе се бори против сите договори кои ги рушат постулатите на АСНОМ“.
„Извршната наредба на Бајден за санкции на сите субјекти кои се против Охридски и Преспански договор е дел од империјалистичката надворешна политика на САД која оперира со притисок, санкции, закани и воени интервенции – насилничка политика“, објави оваа партија.
Во соопштението се додава:
„Но, она што е важно за нас да се потцрта, конкретно за интересите на Македонија, е тоа што уште еднаш се покажува дека во борбата за враќање на националната сувереност и достоинство товарот ќе падне на грбот на обичните граѓани т.е. на класата која не располага со капитал со кој може да биде уценувана на ваков начин, бидејќи нив нема што да им земат. Всушност, ваквите договори како Рамковниот, Преспанскиот и Бугарскиот предизвикуваат регионална нестабилност, а не обратно. Искуството низ годините покажа дека Охридскиот договор е само алатка на задоволување на теснопартиските интереси на ДУИ, кој 20 години е на власт на Македонија“.