Било која партија што ќе освои доволно гласови на предвремените парламентарни избори, да не коалицира со ВМРО-ДПМНЕ и ниедна партија да не признае влада која во составот ќе ја има и партијата на Никола Груевски.
Ова е идејата на партијата Левица која предлага формирање експлицитен кордон околу ВМРО-ДПМНЕ за изолација на партијата, бидејќи, како што велат, таа е креатор на политиките 10 години и само ја упропастува Македонија.
Здравко Савески од Левица денеска изјави дека ако ВМРО-ДПМНЕ освои уште еден мандат, партијата ќе и зарие конечен нож на Македонија и ќе ја уништи земјата.
– Потребно е сите опозициски партии, вклучително и партиите од Албанскиот блок да кажат експлицитно на јавноста и да потпишат заеднички меморандум, дека нема да учествуваат во влада во која учествува ВМРО-ДПМНЕ и нема да поддржат влада во која учествува ВМРО-ДПМНЕ. На таков начин, не само јавноста ќе има потранспарентна слика за позициите на сите политички партии учесници на изборите, туку и меѓународниот фактор ќе биде дестимулиран да прави некои постизборни комбинации кои ќе ја вклучат онаа партија која зад себе има оставено крупен криминал во оваа земја, рече Савески.
Тој потврди дека новоформираната партија ќе излезе самостојно на изборите, и како што вели Савески тоа нема да ги раситни гласовите, бидејќи имало голем број на граѓани кои се незадоволни од досегашната понуда од постоечките партии.