Социјалдемократскиот сојуз на Македонија повикува на итно одржување на лидерска средба со сите парламентарни партии заради настаните од изминатите денови кога се случија сериозни инциденти, со палење на државното знаме, пукање со оружје и поткопување на меѓуетничките односи.
Дестан Јонузи
Лидерска средба што ја побара СДСМ за опозицијата е лек за тензиите по настаните од изминатите денови кога се случија сериозни инциденти, со палење на државното знаме, пукање со оружје и поткопување на меѓуетничките односи. Од друга страна, според Владата – непотребна е лидерска средба
Ана Чупеска потпретседателка на СДСМ, во изјава за „Фронтлајн“ вели дека она што го очекува СДСМ, е Владата да покаже максимум одговорност во врска со случувањата во земјата.
– Последните настани воопшто не се наивни, и оттука сметаме дека една лидерска средба е неопходна со цел, да упати порака за смиреност и за важноста на мирот и стабилноста, нагласи Чупеска.
Убедени сме, додава таа, дека ова не се моменти за дневнополитички поентирања, туку за државничко и максимално одговорно однесување.
– Истото се однесува и на барањето за национален консензус за ЕУ интеграциите на државата. Неколку пати повторуваме дека ќе дадеме поддршка на секое решение кое е реално оддржливо. За жал од Власта сè уште нема такво нешто, напротив, тие лавираат меѓу флоскулите за „одложено дејство“ и „дополнителни гаранции“, а обете се чинат како да се со „фантомски“ статус. Ниту ги објасниле, ниту некој ги видел. Затоа Филипче, во конструктивен тон, впрочем и предложи затворена Седница, во случај да тие нивни предлози се засегнати од извесна дискретност и доверливост. Ние, значи, и по двете точки, не бараме нешто за нас лично, туку бараме, одговорно водење на државата! Наместо да сведочиме за засилен од во неизвесност, изјави за „Фронтлајн“, Ана Чупеска – потпретседателка на СДСМ.
Претседателот на СДСМ, Венко Филипче предупреди дека одбивањето на иницијативата за лидерска средба ќе испрати опасна порака – дека некои политички фактори можеби имаат интерес од продолжување на тензиите. Тој повика на итен политички дијалог за да се надмине тековната криза и да се спречи нејзина ескалација.
– Повторно ќе кажам, не гледам причина зошто некој не би учествувал на таква лидерска средба. Сериозна е ситуацијата, а се остава сомнеж дека некој има интерес од вакво влошување. Ако некој ја одбие таа средба, ќе сметам дека апсолутно има причина да се надева дека тензиите можат да донесат некаков политички бенефит, истакна претседателот на СДСМ.
Владата не гледа причина за лидерска средба. Вели дека има капацитет за да води институционални дијалози во рамките на извршната и законодавната власт.
– Како Влада не ја гледаме објективноста за барањето за средбата. За целта треба да ги прашате тие што ја барат. Сега имаме Влада која и во рамките на извршната и во рамките на законодавната власт има капацитет да води такви политички дијалози, сосема е чудно зошто ова барање за лидерска средба доаѓа преку медиумите, се надеваме дека знаат како се испраќат официјални барања за лидерска средба, нека испратат па ќе размислиме и ќе одлучиме. Ова Влада не работи за желбите на политичарите, исклучиво за интересите на граѓаните, изјави портпаролката на Владата, Марија Митева, запрашана за барањето на опозицијата за лидерска средба.
Од ДУИ на Али Ахмети велат дека никогаш немале против за лидерски средби, но велат дека, многу е битно да се одлучи форматот на таквата средба.
– Многу е битно да се одлучи форматот на таквата лидерска средба, да не доаѓа до девалвација на тоа кој лидери ќе учествуват. Начелно ние немаме против, изјави организацискиот секретар и пратеник на ДУИ, Блерим Беџети.
Од коалицијата ВЛЕН за „Фронтлајн“ велат дека во принцип не се против, и дека како што велат „нема ништо лошо од средбите“.
Политичкиот аналитичар Благојче Атанасоски смета дека лидерската средба ништо суштинско нема да се смени
– Лидерски средби меѓу власта и опозицијата треба да бидат нормални во демократски и цивилизирани земји, каде што ќе се разговара за сите суштински работи околу иднината на државата. За жал, поларизацијата меѓу елитите и секојдневното обвинување доведува до беспредметни средби на кои ништо суштинско нема да се смени, вели за „Фронтлајн“, Атанасоски.
Социјалдемократскиот сојуз на Македонија повикува на итно одржување на лидерска средба со сите парламентарни партии заради настаните од изминатите денови кога се случија сериозни инциденти, со палење на државното знаме, пукање со оружје и поткопување на меѓуетничките односи.
Според опозицијата, овие настани, сериозно ги вознемирија граѓаните, удрија по темелите на соживотот, безбедноста и сигурноста.
Текстот е сопственост на Фронтлајн