Првиот човек на американската одбрана Лојд Остин денеска пристигна во дводневна работна посета на Бугарија. Според агендата за престојот која ја објави бугарското министерство за одбрана, Остин ќе се сретне со својот домаќин, министерот за одбрана Драгомир Заков а утре и со премиерот Кирил Петков. Остин и Заков ќе учествуваат и на заедничката вежбовна обука која ја изведуваат американските и бугарските војници на полигонот во Ново Село а кои ќе траат 6 месеци. Она што, на прва го подгрева интересот за оваа посета и поттикнува многу непознаници е зошто во агендата на Остин го нема бугарскиот претседател Румен Радев?!

Тој одговарајќи на оваа дилема при посетата на Стара Загора, изјави: „Да не заборавиме дека ова е министерот за одбрана, а не претседателот. Се решаваат оперативни прашања кои се целосно во надлежност на извршната власт, појасни Радев. Тој важи за човек кој не дозволува Бугарија да им дава оружје на Украинците.

„Мораме да бидеме солидарни со украинскиот народ. Секој кој зема оружје и на тој начин ја вовлекува Бугарија во војна, мора да може да се соочи со јавноста и да го објасни ризикот, бидејќи цената секогаш ја плаќаат граѓаните, а не политичарите. Нашата главна задача е да ги спречиме бугарските граѓани, нашите стратешки локации – како што е нашата нуклеарна централа да останат без соодветна воздушна одбрана. Можете да видите дека беспилотни летала со полнења паѓаат на територијата на соседните земји. Не смееме да дозволиме тоа да се случи кај нас, истакна Радев..

Посетата на првиот човек на Пентагон на Бугарија кога дипломатските напори за прекин на огнот во Украина не вродуваат со плод а се повеќе ослабува и поддршката за испорака на оружје на Украина, се случува во критичен момент кога се се погласни анализите на познавачите на тактиките на војување, дека Путин ќе посегне и по нуклеарно оружје.

Во интервју за бугарското национално радио пред посетата, на високиот американски гостин, Заков ја оцени како исклучително значајна и дека ќе се разговара за формите за воена помош за Украина како дел од сојузништвото во НАТО и Европската унија, изјави тој.

На посетата на Лојд Остин на Бугарија и претходеа посетите на Брисел и на Словачка. Би-Би-Си коментира дека американскиот секретар за одбрана Лојд Остин е на турнеја низ Европа, особено Бугарија и Словачка, за да разговара со сојузниците дали знаат  да ракуваат со противракетните системи инсталирани на нивни територии.  

„САД разговараат со сојузниците кои имаат системи за противвоздушна одбрана со кои Украинците знаат како да работат – и можеме да очекуваме дека ќе се разговара за системите за противвоздушна одбрана за време на патувањето на американскиот секретар за одбрана Лојд Остин во Словачка и Бугарија“, информираа уште медиумите. Словачка и Бугарија имаат противвоздушни системи С-300 од советско производство со кои може да се справи украинската армија. Словачка веќе се согласи да го отстапи таквиот систем, под услов веднаш да и биде заменет со друг.

Бугарската влада премолчено, не се согласува со барањата на Украина за воена помош. Причината е што коалицискиот партнер БСП е стриктно против. Нејасна е и позицијата на претседателот Радев да и помогне на Украина со оружје кога инсистира бугарското небо да го чуваат авионите на НАТО зашто бугарските „ловци“ се во мал број и во лоша техничка состојба.

(М.Т.)