На денешните локални избори во Албанија, бојкотирани од опозицијата, до 15 часот правото на глас го оствариле 546.388 граѓани или 15,5 отсто од вкупно запишаните во единствениот избирачки список. Портпаролката на Централната Изборна Комисија (ЦИК), Дрилона Хоџај, на втората прес-конференција рече дека изборниот процес се одвива нормално.
„Највисок одѕив е забележан во Тирана каде до 15 часот гласале 107.108 граѓани, потоа Фиер 30.440, Елбасан 27.466, Корча 13.500, Подградец 11.265 граѓани“, рече Хоџај.
Таа повторно ги повика граѓаните да го остварат своето граѓанско право затоа, како што рече, изборите во демократија може и треба да произлезат единствено од дадениот глас. Одѕивот на гласачкото тело до 11 часот, пак, беше 12 отсто.
Во единствениот избирачки список се запишани вкупно 3.464.328 лица со право на глас, но поради масовната миграција реалната бројка е многу помала. Според пописот од октомври во 2011 година, Албанија има 2.891.977 жители. Со постојано место на живеење во Албанија се 1.421.810 жители додека другите се пријавени со престој во странство до една година.
Инаку, изборниот процес го набљудуваат 150 набљудувачи на ОБСЕ/ОДИХР, 20 набљудувачи од американската амбасада и по четворица од италијанската и британската амбасада. Текот на избори на повеќе места го набљудуваа евроамбасадорот во земјата, Луиџи Сореца како и амбасадори на неколку странски дипломатски претставништва.