На синоќешната седница на Централниот комитет, ЛП ги утврди листите на кандидати за претстојните предвремени избори.
Претседателот Ивон Величковски е носител во првата, потпретседателот Кире Бузлиев во втората, Даница Јованова од Кавадарци во четвртата, а економистите Данчо Марковски од Велес и Кице Мицковски од Ресен се носители во третата и петтата единица.
Извршниот комитет е овластен да ги утврди евентуалните листи на кандидати за изборните единици 6 и 7.
– Доста беше нечујност и невидливост. Доста беше балансирање со туѓите на сметка на политиките, понудата и ставовите на Либералите. Сега секој што ќе ја поддржи Либералната платформа – поддржува јасна платформа на граѓански блок во кој поддршката ја дава лично и несебично – на основа на анти-популизам, реализам и одржливост. На основа на она што го гледа и чувствува, без поткуп, закана или притисок. Затоа што така сака. И затоа што ќе ја брани слободата на свој избор.
Доволно беше одење по „големата“ слика во интерес на туѓи партиски елити. Доволно сносевме одговорност за туѓи грешки. Сега е до нас – или ќе успееме – или ќе успееме. Нема алтернатива.Нашата борба е консолидирана Македонија. А неа може да ја донесат луѓе само без претходни флеки, иако нема да ме изненади да се обидат да не внесат во нивните валканици. Бидете внимателни и отпорни. Пробале да не поткупуваат, да не заплашуваат – не успеале. Затоа сме денес тука каде што сме.
Од овие причини немаше основа за соработка со партиите кои политиката сакаат да ја водат како и сега. Директно речено, не сакаме да учествуваме во партискиот поредок на „големите“ што мора да го срушиме. Затоа што тој поредок е основата за кризата што ја живееме континуирано, рече претседателот а партијата Ивон Величковски.
Тој ги повика, како што рече, не само либералите и неопределените, туку и сите оние кои кои сметаат дека е потребна опозициска политика за победа на власта, а не за кохабитација со власта.