Имаше право Јусеин Болт кога кажа дека Јувентус е посилен, но погреши во прогнозата дека неговиот Манчестер јунајтед ќе победи. „Старата дама“ ги заведе „црвените ѓаволи“ и ги совлада со 1:0 во мечот од третото коло во групата Х во Лигата на шампиони.
Фудбалскиот спектакл на „Олд Трафорд“ го одбележа враќањето на Кристијано Роналдо кој беше асистент за погодокот на Паоло Дибала во 17. минута.
Англиско-италијанската пресметка го оправда епитетот дерби на вечерта во ЛШ. Јувентус беше подобар во првото полувреме, Јунајтед беше поопасен ривал во второто, но резултатот остана непроменет по реализацијата на гостите од Торино.
Убедливи победи во останатите дуели на Рома и на Манчестер сити. И „волчицата“ и „граѓаните“ славеа со 3:0 против ЦСКА Москва, односно, Шахтјор Доњецк. Реал Мадрид со 2:1 ја совлада Викторија Плзен на „Бернабеу“, Ајакс со минимални 1:0 триумфира над Бенфика, а најефикасно беше во Германија каде Хофенхајм и Олимпик Лион одиграа 3:3.
Лига на шампиони, 3 коло
Група Е
Ајакс – Бенфика 1:0, АЕК – Баерн Минхен 0:2.
Табела: Ајакс 7, Баерн Минхен 7, Бенфика 3, АЕК 0.
Група Ф
Шахтјор Доњецк – Манчестер сити 0:3, Хофенхајм – Олимпик Лион 3:3
Табела: Манчестер сити 6, Олимпик Лион 5, Хофенхајм 2, Шахтјор Доњецк 2.
Група Г
Рома – ЦСКА Москва 3:0, Реал Мадрид – Викторија Плзен 2:1
Табела: Реал Мадрид 6, Рома 6, ЦСКА Москва 4, Викторија Плзен 1.
Група Х
Манчестер јунајтед – Јувентис 0:1
Јанг Бојс – Валенсија 1:1
Табела: Јувентус 9, Манчестер јунајтед 4, Валенсија 2, Јанг Бојс 1.