Зоран Иванов
Црвениот крст вечерва соопшти дека граѓани и фирми донирале 800.000 евра за настраданите вo пожарот во кочанската импровизирана дискотека.
Мртов ладен го кажа тоа на ТВ главниот на Црвениот крст. Кажа дека таму кај нив уште дремат 800.000 евра.
800.000 евра суви пари што граѓани и компании ги донираа за лекување на повредените во кочанската трагедија.
Уште дремеле во Црвениот крст.
Чекале некаква бирократска владина здравствена комисија да кажела “кому по колку”.
Па, Црвен крст, каде тоа вие живеете и дејствувате? Во која тоа скандинавска држава сте или сте тука со нас и со кочанчани во оваа нашава балканска.
Затоа, најмалку што треба сега да знаете е да знаете дека додека вие чекате на владината здравствена комисија, не чекаат изгорениците на кочанските деца.
Оттаму, од Кочани, катадневно апелираат за помош. За пари за медицински средства, за услови болнички и за соодветни кадри.
А парите, еве и овие од донации, дремат.
Црвен крст, баталете бирократијата државна.
Гедајте бргу самите да најдете брз соодветен начин да им ги дадете наменски донираните хуманитарни пари на кочанските пациенти настрадани во тамошниот пожар.
Тоа се нивни пари. Пари наменски за нив, за нивното макотрпно лекување.
Не дозволувајте хуманитарните донации да ви ги држат заробени некои државни бирократи.
Не дозволувајте поради други да црвенее вашиот образ.
Најдете брз и соодветен начин кај настраданите да дојдат нивните пари.
Пуштете им ги веднаш зашто колку покасно ќе им стасаат толку побесполезни ќе им се.
Толку повеќе безвредни и толку повеќе неважни ќе им бидат доколку им стасаат предоцна.
Ако поради недостиг од пари, раните на децата почнат да ги напаѓаат разни инфекции кои, ова наше скудно локално здравство сега се мачи да ги зацели, тогаш џабе од, нели, донациите наменски.
Ако таа трагичност почне да се случува, тогаш тие 800 илјади евра, ќе бидат нај утнатата македонска хуманитарна инвестиција.
Затоа, Црвен крст, баталете тоа владата и владината бирократија. На настрадасните пуштете им ги нивните пари веднаш. Веднаш.