Зоран Иванов
Не е можно. Едноставно не е за верување дека тоа токму така се случило. Не е за верување дека е точно.
Не верувам на информациите што кружат во јавноста преку социјалните мрежи дека денешната стипендија што како документ во свечена бордо сомотска црвена фасцикла, претседателот на ВМРО-ДПМНЕ и премиер Христијан
Мицкоски му ја врачи на младиот средношколец херој од Виница Јован Костадинов кој од опожарената кочанска дискотека извлече дваесет свои врсници и на кои им го спаси животот, не е израз на хуман гест на премиерот или на целата влада.
Момчето само што излезе од болница, владиниот ПР или самиот актер премиерот, наводно, уште само наводно, еве со сите огради, си смислиле досетка.
Си смислиле желбата на колективот Алкалоид во натамошното школување да го стипендира ученикот Костадиновски, да си ја приграби Мицкоски.
А тоа што авторитетната и докажано донаторски хуманата компанија Алкалоид овој чин му го дозволила на премиерот, му ја делегирала својата хуманост, тоа е друга тема.
Фактот што од чинот на врачување на документот за стипендија во владините простории, премиерот си направи ЕПП и што неговите од Пи-Ар продукцијата му стокмија цел маркетиншки спот за да ја прикаже неговата, излегува наводна, хуманост, хуманост со туѓите пердуви, има само еден збор кој, да не биде разбран како навреди, ќе биде употребен при крајот на овој кус текст.
Сега, во овие редови, со сите огради за точноста на информациите што кружат дека стипендијата за момчето херој е донација од вработените во фармацевтската индустрија Алкалоид, а не од премиерот или од владата, само ќе констатирам дека ова денешно наместено врачување на стипендијата од страна на премиерот Христијан Мицкоски, беше чин на гола маркетиншка функција кој ги надмина сите скрупулни граници.
Затоа, ваквите информации ги примам со длабока резерва.
Едноставно, не е за верување дека некој, кој и да е, на кава и функција и да е, какви амбиции и да има, и каков по карактер и да е, може да смисли ваква, најблаго кажано, девијантна употреба на една невидена трагедија и, исто така, да употреби и едно младешко херојство.
И, сето, за некакви свои себични рејтинг политички цели.
Не верувам. Не верувам во толкав квантум лицемерие.
Не, не. Дотаму не е можно.
Би било тоа грдо. Нечовечки грдо.