Зоран Иванов
Вечерва, ТВ спортски извештај од Европската младинска олимпијада во Македонија и репортерот мртов ладен ни соопштува:
„Денеска настапија сите наши репрезентации во групни спортови и сите – загубија“
Не бе колега, децата наши не загубија, загуби државата Македонија.
Загуби системот наш политизиран, загуби чесноста наспроти криминалот децениски.
Пак, потврдено, доби корупцијата наша македонска.
Се сеќавам на времето, на она мое време, кога како младинска репрезентација на тогашна Република Македонија ќе стасавме на натпревар на „Плесо“ во Загреб, на Сињ и на Опатија исто, во Порторож Словенија или таму во ним конкурентната Мурска Собота или на „Лакташи“ кај Бања Лука или на „Бутмир“, Сараево, или во Параќин или на устието на Сава и Дунав во Белград или исто таму ама на „Лисичји јарак“ кај Падинска скела, или „Липањ“ кај Приштина па во Титоград, или во уште куп места по тогашна Југославија, кога ги подслушнувавме полугласните реакции на членовите на тогашните републички репрезентации од типот „Стигли су Македонци“.
Сакаа да кажат „Дојдоа Македонците пак да ни ги соберат медалите“.
Тоа така и се случуваше.
Мојата генерација, во таа пресилна југословенска конкуренција, пет пати едно по друго бевме младински прваци на тогашната држава.
Бевме респектирани. Учеа од нас.
Ама имавме систем без партии и без вујковци владики.
Имавме само два критериума – посветеност и резултати.
Само тоа.
А спортскиот ТВ репортер вечерва извести:
„Денеска на Европскиот младински олимписки фестивал во групни спортови настапија сите македонски репрезентации и – сите загубија“.
Не. Не загубија децата.
Загуби државата Македонија, загуби политиката која не изгради систем.
Изгради автархија, изгради анархија, создаде корупција, промовира вредности што ги диктира криминалот.
Во еден ваков државен амбиент, тој и таков систем, на Европскиот младински олимписки фестивал, доживеа крах.
Не спортски. Доживеа крах институционален.
Крах воспитно вредносен во кој неделава ги втурна и нашите млади ентузијасти.
Па после, нашите талентирани ама и фрустрирани деца, ќе си оделе оттука.
Па си одат.