Кошаркарите на МЗТ Скопје беа далеку од посакуваното изненадување на Партизан среде Белград. „Црно-белите“ славеа со 112:94 (по четвртини: 32:19, 37:23, 19:28, 24:24) во меч од 12 коло во АБА лигата и продолжија со негување на амбициите за учество во плеј-офот во регионалното натпреварување. На аеродромци, кои се наоѓаат во тешка криза, им преостанува да трагаат за трета радост во јадранската сезона во некоја наредна, поповолна, прилика.
„Правевме катастрофални грешки што скапо нè чинеа. Мечот го загубиме буквално во првото полувреме. Честитки до Партизан за заслужената победа“, беше кусиот коментар на Дамјан Стојановски на прес-конференцијата по средбата.
Македонскиот шампион беше „присутен“ во салата „Александар Николиќ“ во српската престолина само во воведот од натпреварот во кој поведе со 2:8 за потоа ништо да не зависи од него. Домашните одговорија со серија од 11:2, набрзо потоа изградија двоцифрена предност што без проблеми ја одржуваа до последната минута.
„Првото полувреме го одигравме катастрофално. Морам да ги научам моите кошаркари како се игра одбрана. Примивме голем број на кошеви и од дополнителните слободни фрлања кога не бевме во бонус. Нѝ недостасуваат тренинзи, но времето е пред нас. Не е страшно да се загуби од Партизан овде. Сепак ќе мора да научиме нешто од ова. Се надевам дека во наредниот период, со некои тимови со сличен квалитет, ќе можеме да прикажеме подобра игра“, изјави Жељко Лукаиќ, тренер на МЗТ Скопје.
Михајло Андриќ беше прв стрелец со 29 поени, Патрик Милер и Александар Аранитовиќ уфрлија по 17, Најџел Вилијамс Гос реализира 12, Новица Величковиќ 11. Најефикасен кај МЗТ Скопје беше Бојан Трајковски со 20 коша, Дарко Соколов постигна 14, Јуре Лалиќ 13, а Дамјан Стојановски 12.
МЗТ Скопје во наредното коло (23 декември) ќе биде домаќин на тимот на ФМП.