Лукаревска – Голдстајн: Благодарни сме на поддршката од ОБСЕ, СДСМ останува посветена на процесот на реформи и надминување на последиците од кризите

Заменик претседателката на СДСМ, Сања Лукаревска, заедно со претседателот на СДММ, Марко Михаилоски, денеска се сретна со заменик шефот на Мисијата на ОБСЕ, во Скопје, Џеф Голдстајн, на која се разговараше за повеќе актуелни теми, соопштија од СДСМ.

Осврнувајќи се на актуелната општествено политичка ситуација, Лукаревска истакна дека СДСМ преку Владата што ја предводи останува посветена на процесот на реформи, но и на политиките што го унапредуваат животниот стандард на граѓаните и обезбедуваат помош во време на економска и енергетска криза.

„Во изминатиот период реализираме нов сет на мерки за подобрување на животниот стандард на граѓаните. Сите надлежни институции се посветени на надминување на последиците од енергетската и економската криза. Затоа, неодговорно е барањето на ВМРО-ДПМНЕ за предвремени избори, сега не е време за избори, туку за решавање на кризите“ порача Лукаревска.

Заменик претседателката Лукаревска изрази благодарност до ОБСЕ за досегашната поддршка што оваа организација ја дава на Република Северна Македонија особено во делот на унапредување на демократските вредности.

Заменик шефот на Мисијата на Обсе, Голдстајн, порача дека ОБСЕ останува посветен партнер на Република Северна Македонија како во процесот на реформи, така и во подготовката за претседавањето со ОБСЕ кое нашата држава ќе го преземе следната, 2023 година.